QUITO, Ecuador (AP) — Despues di tramitenan cu e gobierno Britanico, e condicionnan a keda crea pa Julian Assange sali ora cu e kier for di e embahada Ecuatoriano na London, e presidente Lenin Moreno a bisa diahuebs.
E fundado di WikiLeaks a busca refugio den e mision diplomatico Ecuatoriano riba suelo Britanico na juni 2012 pa evadi un orden di extradicion na Suecia, unda cu e tabata wordo acusa di delitonan sexual.
Den un entrevista cu e Asociacion Ecuatoriano di Radiodifusion, e mandatario a bisa cu tramitenan a keda realisa cu e gobierno Britanico, pidiendonan “respet pa derecho humano, pa e bida di Sr. Assange, pa tin garantia di cu e lo no wordo extradita pa ningun pais unda cu su bida ta core peliger of cu ta existi pena di morto”.
El a agrega cu “nan a manda nos un comunicacion oficial di gobierno Britanico indicando cu e constitucion di Gran Britania ta prohibi pa un persona wordo extradita pa un luga caminda cu su vida ta core peliger”.
P’esey, Moreno a indica, “e caminda ta habri pa Sr. Assange tuma e decision di sali pa un casi libertad, ya cu e no a presenta dilanti di huesnan Britanico y e mester paga un castigo pa esaki, aunke no largo. Esey ta husticia Britanico lo mester dicidi esey”.
Tanto Assange como su abogadonan tin miedo di cu e por wordo extradita pa Merca, pais cu el a revela secretonan militar y di estado y unda husticia a bin ta pidi pe pa e responde pa su echonan.
Suecia a retira e cargonan contra di Assange pa acoso sexual pero husticia Britanica na februari a nenga su peticion di libertad debi cu e magistrado ta considera cu tabata tin incumplimento di e condicionnan di su libertad condicional.
Ecuador a duna Assange nacionalidad Ecuatoriano na december, como parti di su esfuerso pa haci’e miembro di su ekipo diplomatico, loke lo garantisa cierto derechonan manera inmunidad legal. Sin embargo, Gran Britania a rechasa e peticion di entrega status diplomatico na Assange.