E actriz Mericano, Heather Locklear, conoci pa e serie “Melrose Place”, a wordo aresta diadomingo pa supuestamente agredi su pareha como tambe varios oficial di polis cu tabata purbando di stop e, segun e corant Los Angeles Times.
E oficina di comisario di e condado di Ventura a splica cu varios di su oficialnan diadomingo a acudi na e cas di e actriz na Thousand Oaks, un ciudad situa na 60 km west di Los Angeles, den un presunto agresion di e actriz contra di su pareha.
Segun e medio specialisa den noticia di famosonan TMZ, Locklear y su pareha tabata bringando pa cual e ruman di e actriz, cu tabata na e cas a yama polis.
Locklear a resisti su detencion y e supuestamente el a agredi varios oficial cu tabata purba di hink’e den e auto di polis.
E sargento Eric Buschow a bisa cu e actriz no a coopera y cu e tabata tin un comportacion hostil durante su aresto.
E actriz a paga un fiansa di 20 mil dollar pa sali for di prizon di e condado di Ventura. E actriz den pasado tabata tin problema cu abuso di remedi receta y tabata sufri di depresion.
Fuente: https://www.elnuevodiario.com.ni