Durante un conferencia di prensa yama pa misa di Dakota Fatima Sra. Vanessa Croes – Croes a splica riba evento pa recauda fondo.
E actividad aki lo tuma luga dia 2 di Juli pa asina logra haya fondo pa Misa Fatima di Dakota. Nan lo organisa un radio – telethon combina cu diferente actividad pa henter e pueblo di Aruba por contribui na un forma ameno yena di amor, alegria y goso durante henter un diadomingo, un diadomingo di famia.
Sra. Croes a sigui bisa cu e actividad lo ta riba parkeerplaats di Centro di Bario Dakota. Y nan lema pa e actividad aki ta carga e titulo, lema :”Fatima ta di nos dos”. No tin manera mas bunita cu e luna aki di Mei, unda ta celebra e 100 aña di aparicion di Mama Maria. Manera Hesus a bisa cu Maria ta mama di nos tambe. E pueblo ta keda cordialmente invita pa bin celebra cu Mama Maria y aporta na e bon causa aki, pa asina recauda fondo pa e renobacion di e misa di Birgen di Fatima na Dakota.
Tur cos lo cuminsa for di 10 or di mainta, te cu 6 or di atardi. Lo tin presentacion di bandanan musical, ambiente, animacion pa grandi y chikito. Cuminda di diferente pais, ya cu ta diferente nacionalidad ta biba na Aruba y nos ta un solo pueblo. Ta pesey lo tin cuminda di diferente nacion y cultura, pa asina haci e dia aki completo.
Prensa lo cubri e evento aki, Magic 96.5 fm a confirma nan presencia. Den transcurso di dianan benidero nan lo haya mas confirmacion.
Reserva e fecha aki pa bo ta hunto cu nos, pa celebra hunto cu Fatima, Maria, Mama Maria, La Birgen di Fatima sigur den un actividad asina bunita y specialmente pa e causa pa logra e renobacion di e misa.
Sra. Vanessa Croes- Croes a splica cu e ta un actividad completamente gratis, ta cumpra cuminda, aportando asina na evento. Lo tin e radio- telethon pa tur esunnan cu kier aporta loke nan curason ta desea cual lo haci cu nan lo yega na e meta stipula.