Diahuebs prome cu 4’or di marduga riba caminda di Tanki Leendert net pabou di Rococo Plaza un accidente fuerte semi frontal a sosode cu a laga dos auto basta kibra y te hasta un riem completamente ranca. Polisnan a presenta di biaha n’e sitio y a cera e caminda. Tabatin un dama den un nissan march herida y ambulance a presenta di biaha unda paramedico a brinda asistencia.
E dama chauffeur di e march no tabatin rijbewijs y tabata bebi,nan a purba na burla polis di kende tabata na stuur pero polis a mira tur cos prome y a haya un tip. Asina a bay over na detene e dama.
E chauffeur masculino di e nissan micra tabata biniendo for di pabou, y no tabata desea di asistencia medico, su auto a keda full kibra dilanti, y a conta polis cu nan tabata biniendo den su banda contrario y aki e autonan a dal basta duro cu otro.
Na final roadservice su takelwagen a kita e autonan kibra for di caminda.