Rond di 4’or di marduga a sosode un accidente pisa un poco panort di Wendy’s Palm Beach direccion di Marriott.
E prome informe ta indica cu door di velocidad halto chauffeur di un Kia Picanto a perde control y a bay dal den un poste di luz. E impacto a saca algun di e victima for di e auto, mientras cu dos di e hobennan den susto y shock a bay for di e sitio.
Diferente unidad policial a yega na e sitio y tres ambulance pa atende cu e victimanan. Un patruya a topa cu e dos hobennan, kendenan di susto a core bay for di e sitio na pia. Mester a pidi slachtofferhulp pa nan ya cu nan tabata hopi spanta.
E patruya a hiba nan bek na e sitio di accidente.
Na e sitio e paramediconan a trata e cinco heridonan, entre otro un mucha muhe. A transporta cuatro di e heridonan pa hospital, mientras cu patruya a hiba e di cinco, cu tabata esun mas stabiel.
Segun por a compronde, alcohol a hunga un rol tambe den e accidente aki.
Tur autoridad concerni a wordo manda pa e sitio pa haci e investigacionnan necesario.