Diasabra algo pasa di 10:15 anochi riba Caya Betico Croes caminda principal di Hooiberg pa Santa Cruz ta sosode un accidente fuerte poco pabou di Hooiberg supermarket. Polis di trafico a keda dirigi pa e sitio y ta topa cu un chevrolet celta pega riba un baranca banda di caminda. A constata cu un pickup color blanco a dal basta duro su tras.
Polis di trafico a haci nan investigacion y a mira un lastro di brake basta largo cu logico ta indica e chauffeur di e pickup tabata bahando for di pariba riba un velocidad halto cu a dal tras di e celta. Ambulance a presenta pa un dama cu tabata den e chevrolet celta herida. Polis a pone e manehado di e pickup supla y a surpasa e limite y a keda deteni hiba warda.