Diasabra merdia rib’e caminda di Kudawecha net pabou di e veld a sosode un accidente fuerte entre un nissan cube y un hyundai, e impacto tabata asina fuerte cu a laga cinco persona herida. Polisnan a cera e caminda di biaha, pa evita cu automobilistanan stroba autoridad di traha debi cu tin auto memei caminda.
Dos unidad di ambulance y dos rapid responder a presenta di biaha. A trata tur persona di biaha pa controla nan salud, tur hende tabata herida pero stabiel. E hyundai a dal basta duro den cura di un apartamento te hasta destrui meter di awa. N’e sitio polis a pone e chauffeur di e hyundai pasa test di alcohol y esaki a surpasa e limite y a keda deteni. Na final e auto destrui riba caminda a keda poni un banda, ambulance a hiba e heridonan pa hospital.