Willemstad Curacao: Djasabra 7 aprel 2018, alrededor di 04.03 or sentral di polis a haña notifikashon ku riba Winston Churchillweg tin un dalmentu entre dos outo i ku tin varios herido. Na yegada di e patruya polisial nan a bin topa ku e dos (2) outo, outo numer 1: un Ford Focus korá i outo number 2: Un Scion pretu. Tabatin total kuater (4) herido (2 hòmber i 2 dama) den outo number 1.
Un di e víktimanan, un dama ku tabata sintá dilanti banda di shofùr di outo number 1 no tabata duna señal di bida. Den outo number 2 tabatin solamente e shofùr ku a sinti poko doló na su hep. Ku ambulans a transportá tur e sobrá tres (3) víktimanan pa SEHOS pa tratamentu médiko kada unu ku leshon(nan) ku ta varia di kap na kachete, ènkel / man frakturá / kachete i nanishi frakturá.
For di un investigashon preliminar ku polis a realisá na e sitio a resultá ku e shòfur di e outo number 1 (Ford Focus korá) tabata kore riba Winston Churchillweg direkshon Sta. Maria mientras shofùr di outo number dos (Scion pretu) tabata kore riba mesun kaya pero direkshon kontrali (direkshon rio Canario). Pa un motibu ku te na e momento aki ta den investigashon, e hòmber shofùr 27 aña di edat, ku tabata manehá e outo number 1, e Ford Focus koló korá, a desvia na su man robes i a sigui kore einan ku konsekuensia ku e la bin dal frontal kontra outo number 2 ku e konsekuensia ariba menshoná.
Alrededor di 04.50 or dòkter di polis a konstatá morto di e dama Raïsha Rationella Offerman, nasé na Hulanda 15 febrüari 1992 ku tabata sintá dilanti banda di e shofùr den outo number 1. E víktima aki a haña un fraktura na su nèk.
Durante ku e polisnan tabata hasi investigashon na e sitio, polis a haña informashon ku un di e viktimanan ku tabata involví den e aksidente a skonde algu bou di un kliko den serkanía. Ora ku polis a bai investigá nan a haña i konfiská un pistol marka Glock ku un kashi di bala largu.
Polis ta supliká kualke persona ku tin informashon riba e aksidente di tráfiko aki pa tuma kontakto ku Departamentu di Tráfiko na telefòn: 866-6134 / 866-6137 / 866-6236. E investigashon den e kaso aki ta kontinuá.