ROMA, Italia – (AP) — Por lo menos 20 persona a resulta herida diamars anochi despues di un fayo den e roltrap di e sistema di transporte metropolitano di Roma.
Un video di e canal di television Sky TG24 ta mustra con e roltrap ta cuminsa subi di speed derepente, causando cu e personanan cu tabata bahando ta cuminsa dal den toro. E grabacion ta mustra con personanan riba e otro roltrap ta purba di hala e otro personanan pa un luga sigur.
E causa di e fayo no ta conoci ainda. E investigadonan a cera e station di metro Piazza Repubblica, cerca di e principal stadion di trein Termini.
“E escena cu nos a haya ta un grupo di persona tur para cerca di otro riba e roltrap”, e hefe provincial di bombero di Roma, Giampietro Boscaino a bisa. “Un ariba otro, buscando yudansa. Algun di nan tabata tin lesionnan causa door di e fayo di e roltrap, por lo tanto ta lesionnan severo”.
E departamento a informa cu 20 persona a resulta herida, e mayoria di cual tabata fanaticonan Ruso cu tabata den e ciudad pa un partido di e Champions League entre CSKA di Moscu y Roma. Segun bomberonan, shete victima ta den condicionnan serio.
Alcalde di Roma, Virginia Raggi, a bsia cu segun testigonan e personanan tabata baila y bula ariba e roltrap prome cu e accidente, segun e agencia di noticia ANSA. Funcionarionan di e departamento di transporte municipal a bisa cu e mantencion di e roltrapnan ta wordo haci tur luna, e agencia a sigui bisa.
Den un incidente separa, un fanatico di CSKA a wordo hinca durante enfrentamentonan cu fanaticonan di e ekipo contrario pafo di e Stadio Olimpico, e agencia a informa.
Mas o menos 1500 fanatico di CSKA tabata na Roma pa presencia e partido.