Con safe bo yiu ta den famia? Cu e slogan aki Fundacion Respeta Mi a presenta su spotnan
educativo nobo tocante abuso sexual di mucha riba diamars 9 di mei 2017, na Universidad di Aruba.
Fundacion Respeta Mi ta hopi contento cu por a conta cu presencia y sosten di Minister di
Enseñansa y Asuntonan di Famia, sra. Michelle Hooyboer-Winklaar y Minister di Husticia, mr. drs. Arthur Dowers. FRM a aprecia e apoyo y sosten di coleganan profesional trahando cu mucha y famia riba tereno social, hudicial, medico y di enseñanza di instancia gubernamental y organisacion no-gubernamental y naturalmente miembronan di prensa.
E tabata un atardi informativo tocante e problematica di abuso sexual di mucha. Entre otro a
trece dilanti, si kier yuda preveni abuso sexual, ta hopi importante pa papia den famia na un
manera habri tocante sexualidad, sex y nos curpa. Ta esencial pa compronde y siña kico ta un desaroyo sexual sano di un mucha entre 0-18 aña, p’asina por señala ora algo bay robes.
Nos tur mester tuma e señalnan di abuso sexual na serio, preferiblemente mas trempan cu ta posibel. Ora un mucha ta experiencia abuso sexual pa añanan largo, e ta core riesgo pa bira victima atrobe mas laat den bida.
Cu e spotnan educativo FRM kier a concientisa cu mayoria biaha abuso sexual ta pasa den seno familiar. Banda di un bida familiar di cuido y cariño, tambe mester pone atencion riba locual tur por bay robes tras di porta di cas relaciona cu abuso sexual di mucha. E fundacion a combina e mensahe di cada spot cu imagennan fuerte cu e meta pa kibra e silencio.