Diaranson mainta Gobierno a cuminsa cu un caso den corte contra e unit managernan trahando na EPI. Ta asina cu desde 11 di Augustus, despues di basta tempo nan ta bezig purbando na yega na un solucion pa algun punto. Segun abogado Sven Faarup, e punto di mas importante cu ta un Unit Manager cual funcion no a wordo yena. E otro unit managernan tin cu cubri e trabao. Nan a purba den tur manera pa yega na un solucion pa e problema aki. Dia 11 di Augustus tabata e fecha cu a bisa cu nan ta pone trabao abao.
Scol a cuminsa dia 18 di Augustus, mientras tanto EPI mes a percura pa cuminsa cu un rooster pa e scol por habri y esaki a pega. Djey a cuminsa cu un kortgeding exigiendo pa e trahadonan, esta e unit managernan reanuda trabao di inmediato. Diaranson mainta e caso a wordo trata.
E caso a bay bon, den e sentido cu e punto a wordo treci dilanti, cual e derecho di strike ta conta mas cu e posicion cu Gobierno a tuma. Hues a scucha dos banda y na final di dia, e partidonan ta bay ta na mesa bek pa yega na un solucion. Esaki ta e unit managernan semper tabata kier den e ultimo dos pa tres cu a wordo manda carta pa nan. E posicion tabata cu pa yega na un acuerdo pa asina nan reanuda trabao y scol por habri normal. E porta aki a wordo habri atrobe y ta na mesa pa asina yega na un solucion y si tur cos bay bon hopi lihe, ta yega na e acuerdo ey, e unit managernan por cuminsa traha bek. Ta spera cu den algun dia esaki lo wordo soluciona.
Abogado Faarup a splica cu hues a laga espacio habri pa partidonan yega na un acuerdo, sino e mes como hues lo tuma un decision y bisa cu e accion cu a wordo tuma ta legal si of no. Un biaha mas, ta asina leu cu a hera yega na un acuerdo pero esaki no a bay door. Ta bek na mesa di negociacion y ta positivo cu lo bay yega na un solucion pronto y cos por normalisa. E punto di salida ta di parti di unit managernan pa trabao sigui y basta yega na cierto acuerdonan y ta positivo riba esaki.
Faarup ta pensa cu esaki no lo dura mas cu cinco dia. E unitmanagernan ta dispuesto pa cuminsa traha mañan mes, si e puntonan cu tin cu yega na acuerdo na dje, wordo soluciona. No ta leu for di otro y ta mustra positivo. Tin cu warda pa wak si Gobierno na final ta bay di acuerdo cu e puntonan y manera cu esaki ta wordo acorda, e trahadornan ta bay traha bek, Faarup a splica.