Sindicato IOWA y abogado Abogado Chris Lejuez, a manda carta pa Gobienro riba e preocupacion di trahadonan di Valero mirando cu Gobierno a haci deal cu Valero pa Citgo sin a tene cuenta cu e CAO di e trahadonan.
Diamars abogado Lejuez a haya bishita di algun miembro di sindicato IOWA y nan a informa cu tin un poco inkietud entre e empleadonan cu ta trahado na Valero actualmente. Nan sa cu Gobierno tabata den negociacionnan cu Valero y cu Citgo y tur e tempo ey IOWA tabata por a tene e hendenan aki trankil, pa no stroba e negociacionnan. Awor cu e negociacionnan a termina, te ainda ningun biaha nan a sinta na mesa cu IOWA. No tabata tin ningun representacion di e empleadonan envolvi den e negociacionnan aki. Nan ta preocupa y cu rason, pasobra tin varios punto cu no a wordo papia y delibera riba dje. Por ehempel nan profit bonus, nan transition bonus, etc. Awor aki e empleadonan ta bira mas inkieto pasobra ta pase cu ta aki algun dia e traspaso lo tuma luga, sin cu nan a sinta na mesa ainda y IOWA ta laga Gobierno y Citgo sa cu ta hopi dificil pa tene e empleadonan trankil awor aki, pasobra traspaso lo tuma luga aki paar di dia y te ainda nan interesnan no a wordo atendi debidamente.
Nan ta laga Gobierno y Citgo sa cu door di esaki no por para responsabel pa cualkier eventual accion cu e empleadonan por tuma.
E carta aki, segun e abogado, ta pa urgi fuertemente na Gobierno pa no laga e cos aki bay for di man sin cu nan atende.
Lejuez a splica adicionalmente cu tin entendi for di IOWA cu Gobierno su intencion cu Citgo ta pa haci e traspaso aki algun dia. Tin di compronde cu ta dia 24 di September, dus nan no lo bay tin hopi tempo y prome cu esey IOWA ta spera di Gobierno y Citgo cu nan lo sinta na mesa y atende e asunto aki debidamente.
Ta poni den e CAO cu nan por tuma over e CAO cu ta existi. Nan mester sigui cumpli cu e mesun condicionnan. Pero tin cierto derechonan cu nan a adkiri, tambe derecho pafo di e CAO cu no a wordo atendi debidamente ainda, segun Chris Lejuez.
