‘Den ki relacion mi ta? Con mi ta hibando mi bida? Kico e relacion aki ta aportando pa ami? Ken ami ta awe?’ Esaki ta preguntanan crucial cu hopi di nos a yega di contempla ora ta trata nos relacion amoroso. Fundacion pa Hende Muhe den Dificultad ta bay start un campaña di conscientisacion durante fin di siman di Valentine’s Day cu lo subraya e mundo di media, y cosnan cu e victima ta pasa aden cu ta haci cu e ta duna e abusador un otro oportunidad.
“Semper tur cos ta mustra bunita den potret pero nos nunca sa kico tin tras di e imagen ey, y algun por bisa cu nan ta bibando un bida falso. Y esaki ta laga hopi hende pensa, te ki dia nan lo keda biba un bida asina?”, Maria Carasquilla, trahado social na Fundacion pa Hende Muhe den Dificultad ta splica. E fundacion ta trata cu asina hopi casonan anual cu nan ta tuma nota di algun cosnan cu ta ripiti y semper keda bin dilanti. Nan ta subraya por ehempel cu varios victima mes ta consciente cu nan ta biba un engaño den nan relacion, un falsedad of un bida cu un imagen falso. “Hopi hende sa esey. Pasobra e ta facil pa nos saca potret y tapa, pasobra parti di maltrato ta e berguensa. E ta keda bin dilanti si cerca nos cu hopi biaha personanan ta bon consciente cu nan ta bibando un bida di imagen. Y si nos ta den un status hopi mas halto, e ta hopi mas” segun sra. Carasquilla.
Conscientisacion tocante ‘Imagen Falso’
E campaña fotografico cu e tema di Imagen Falso ta un campaña a base di e mesun casonan y puntonan cu ta bin dilanti di clientenan cu ta victima. E berguensa of pa sigui tapa pa motibo di menasa, of otro motibonan pa kico un victima no ta bin dilanti y papia. Pero tambe locual tin ta personanan cu por ehempel ta dificil pa nan pa accepta cu nan ta den un problema. “Valentine’s Day ora cu bo ta den un relacion, no mester tin fecha. Pero den violencia domestico esaki ta sosode den un forma di circulo vicioso,” sra. Carasquilla ta splica. E ta sigui bisa cu “Con pa yega na e victima pa sigui cu e circulo vicioso aki por ehempel cu regalonan, palabranan bunita cu e no ta bay haci cierto cosnan mas. Cosnan asina cu ta haci cu como victima bo ta duna un otro oportunidad.”
E meta di e campaña aki tambe ta pa e fundacion cuminsa bira mas visual, pa asina e mensahe por cuminsa circula mas lihe y preciso. “Nos kier trece mas e realidad. Nos kier trece tur otro aspectonan y puntonan cu violencia domestico ta trece dilanti, y con e comportacion di un victima tambe ta.” Sra. Carasquilla ta sigui bisa “Dilanti di hende nos tin un cara, y patras di portanan cera ningun hende no sa kico e personanan aki ta biba aden.
Esaki ta pa comunidad compronde mas kico ta encera violencia domestico y con complica realmente e ta, y p’esey tambe e trabao ta keda pa mas conscientisacion pa e victimanan como tambe pa comunidad henter.”
Pa mas informacion Like e pagina https://www.facebook.com/FHMDaruba y keda informa riba tur pasonan di e campaña, como tambe otro videonan di conscientisacion.