Diabierna lo tuma luga e ceremonia di apertura di e brug nobo na Spaans Lagoen, algo cu Aruba Birdlife Conservation (ABC) no ta di acuerdo cun’e.
ABC ta ta spera cu esunnan cu a haya e vergunning pa e evento aki por compronde cu e brug ta cruza un Ramsar Wetland cual tambe ta forma parti oficial di Parke Arikok.
Segun Aruba Birdlife Conservation (ABC), lo no mester permiti pa e stroba e wetland area aki cu ta wordo reconoci internacionalmente. Mas di 120 especie di parha ta registra den e area di Spaans Lagoen. Ta un luga importante caminda cu e parhanan ta broei. Tambe mester tene na consideracion cu e temporada di migracion pa parhanan a cuminsa, pa cual varios especie lo bishita e wetland aki pa recobra nan forsa despues di a bula pa un distancia largo.
Musica duro y extra lus lo tin un impacto negativo ariba e sensibilidad di e area natural aki y no mester wordo permiti ni prome, ni despues di e ceremonia. Tin otro luganan cu ta mas adecua pa tipo di festividadnan asina. pero e Ramsar Wetland area aki no ta e luga adecua.
Tambe ABC ta conta ariba e organisadonan pa haci nan maximo esfuero pa niun cups, pijp of tayonan di plastico bay den e lagoen.
En corto, mas cortico y mas keto e evento bay, mas miho e lo ta pa e naturalesa di Aruba na e area di Ramsar wetland aki. Actividadnan lo mester por wordo organisa na un otro luga.