Sherman Libiee, Keurmeester na Veterinaire Dienst Aruba ta splica cu naturalmente pa via di Covid19, Abattoir tambe mester a cambia algun cos y bini cu regla. E aña aki lo mata bestia solamente a base di cita, estilo di ‘drop off’ unda bo ta baha bo bestia y bo ta busca esaki ora e keda cla.
Tocante porco mes, ta premira cu e aña aki e lo ta hopi menos door di e situacion di Covid19, hopi restaurantnan a sera cu tabata yuda e criadornan, cual a haci cu e criadornan no tin hopi cuminda mas. Na cumisamento di e pandemia, hopi di e craidornan mester a baha e cantidad basta caba cu nan stapel di porco. Cabrito y carne ta bahando aña pa aña, menos tereno, problema di cacho y ladronnan ta cierto di e factornan tras di esaki.
Pues e sistema nobo lo ta via afspraak y lo cuminsa traha entrante 16 di November te cu 21 di December, di Dialuna pa Diahuebs. Prijsnan a keda mesun cos y hopi biaha ta mesun hendenan ta bishita abattoir cu sa e prijs y con e trabao ta bay.
Sr. Libiee ta splica cu door cu Aruba ta isola door di lama, pa malesanan grandi drenta Aruba ta hopi dificil y nan tin un bon sistema di control tambe. Carni y cuminda no ta bini con cu ta for di cualkier pais pa Aruba, esaki ta bon regula strictamente. Tambe tin actonan ilegal cu ta keda pasa dus por ehempel hendenan cu ta mata y corta e bestianan nan mes, bo ta core riesgo cu cos por bay fout. Dus pa kico bay haci esaki si na Abattoir mes bo por haya e servicio aki na un forma limpi, responsabel y tog tambe na un bon prijs.