A yega acuerdo di acceptacion pa nivel di seguridad door di Departamento di Aviacion Civil Aruba

Departamento di Aviacion Civil Aruba recientemente a aproba e Acuerdo di Acceptacion, pa asina reconose e nivel di seguridad di Amsterdam su aeropuerto Schiphol.
E reconocimento di equivalencia aki ta haci posibel cu buelonan cu ta origina na Schiphol y cu mester pasa via Aeropuerto Internacional Reina Beatrix (AIRB), pa no mester duplica e medidanan di seguridad ora yega Aruba, permitiendo asina pasahero- y maletanan di transito pa pasa sin problema di transito na Aeropuerto di Aruba y por sigui riba otro buelo pa otro destinacion, sin trese e aspecto di safety y seguridad den peliger.
ICAO su Annex 17 ta permiti areglonan similar di controlnan di seguridad, cu sosten di e estado miembro y un proceso di validacion y implementacion continuo di procedura conhuntamente cu e otro estado pa sigura cu e aplicacion di controlnan di seguridad na e punto di origen ta wordo acompaña pa medidanan di proteccion contra interferencia sin autorisacion te ora e avion sali for di e punto di transfer.
Sr. Edwin Kelly, Director di Departamento di Aviacion Civil, a indica cu parti di e proceso pa logra reconocemento di equivalencia a ensera un audit extenso di e procesonan di seguridad na Schiphol, incluyendo e revisacion di personal, trainingnan, proceduranan, ekipo, mantencion, documentacion y otro medidanan pa garantisa e sterilidad di pasahero y maleta.
CEO di Aruba Airport Authority N.V. (AAA), operador di AIRB, Sr. Joost Meijs, a indica cu esaki ta un desaroyo hopi positivo, mirando cu estadonan y aeropuertonan ta sigui busca maneranan pa facilita biahamento mas eficiente entre pais- y aeropuertonan. E ta ansioso pa logra mas acuerdo similar cu otro aeropuerto y estado tambe, mirando cu e acuerdonan aki ta yuda mehora e experiencia di e pasahero door di aeropuerto di Aruba.
Actualmente tin dos aerolinea cu ta biaha directamente for di Schiphol pa Aruba. KLM ta opera 7 buelo non-stop pa siman for di Schiphol pa Aruba cu ta traduci na un averahe di 7500 pasahero pa luna, di cual 3100 ta pasaheronan di transito.
Un cantidad significante di pasahero cu ta biaha for di Schiphol ta pasaheronan di transito, conectando cu otro destinacionnan den Caribe y desde 11 di September, 2019 e pasaheronan aki por pasa e proceso di transito mas facil na Aeropuerto di Aruba.

Comments

comments