Departamento di Asuntonan Economico cu Control y observacionnan di prijsnan na supermercadonan
Durante un Conferencia di Prensa di Gobierno di Aruba, Minister di Asuntonan Economico, mr. Xiomara Ruiz-Maduro a anuncia na pueblo cu e prome paso a wordo tuma pa amplia e cantidad di productonan di Canasta Basico. Esaki ta den cuadro di e maneho cu e ser humano ta keda central.
Tabata ayera mainta cu un team di Departamento di Asuntonan Economico, Comercio y Industria a cuminsa cu un control y observacion di prijsnan di productonan den 12 supermercado na e.o. Oranjestad, Noord y San Nicolaas.
E control aki lo sigui full siman di 5 pa 12 di februari. E mandatario a splica riba e trabaonan cu ta tumando luga pa asina cumpli cu e deseo di pueblo, Gobierno di Aruba ta conciente cu costo di bida ta halto y pa e motibo ey ta hibando un maneho di control y observacion di prijsnan di productonan den supermercado riba varios berdura manera cucumber, lechuga iceberg, tomato roma, brocoli, awacati, pampuna, carot, kool, cabbage, promenton berde y siboyo.
Pa locual ta fruta tambe ta tuma nota y control di prijsnan di e.o. patia, apelsina, bacoba, banana, melon, papaya y apel. Ademas ta tuma nota di prijsnan pa algun producto di grano manera pasta, spaghetti, cereal y productonan den bleki y frozen, juice y lechi.
E informacionnan colecta for di e investigacion ta necesario pa calcula e margen di ganashi riba e productonan y evalua si esaki ta aceptabel. Tur comerciante ta obliga pa duna na controladornan di departamento di asunto economico, e facturanan di e productonan cu wordo pidi, esaki segun “prijzenverordening”.
Asina tambe por informa e pueblo unda nan por haya productonan e.o. fruta y berdura na miho prijs, stimula comerciantenan pa baha nan prijs pa asina ta competitivo. Esakinan tambe lo ta na beneficio di e pueblo.
Na final un raport lo wordo traha y lo wordo presenta na un grupo di trabao caminda mayorista- y detayistanan lo evalua hunto e resultado y hunto bini cu recomendacionnan na Minister di Finanzas, Asuntonan Economico y Cultura pa por amplia e canasta basico cu mas producto. Ademas hunto lo sondea tur e posibilidadnan pa importa productonan di otro mercadonan cu ta ofrece e calidad cu Aruba su consumidor ta custumbra. E meta di Gobierno di Aruba ta pa por tin miho prijs di comestibles na alcance di pueblo di manera cu e comerciante tambe ta mantene un nivel rasonabel di ganashi. Pueblo por sinti e cambio, un gobierno cu ta bisa loke e ta haci y ta haci loke e ta bisa.