Diadomingo atardi un conferencia di prensa a keda yama pa DOW, pa asina papia riba e desaroyonan cu ta tumando, pa loke ta e colaboracion cu DNM. DLVV, Parke Nacional Arikok, pa cual aki Marlon Croes, director di DOW, ta splica mas riba un protocol pa loke ta e proyecto di Watty Vos Boulevard.
No ta algo straño, pero den e proceso di e trabaonan di Watty Vos Boulevard y di Green Corridor ora cu ta haya ta necesario pa informa comunidad di Aruba, ta haci’e un diasabra of diadomingo pa por tene e comunidad di Aruba bon na altura.
Segun Croes, diferente trabao ta tumando luga y un di nan cu dialuna mainta e trabaonan di scan e siguiente area pa por traha y haci limpi den e trayectorio di Watty Vos Boulevard, cu ekipo y esey kiermen cu tin diferente compania di afo cu ta bin haci trabaonan tambe na Aruba. Tin gerencia di diferente compania cu ta trahando proyecto di Green Corridor y Watty Vos Boulevard, cu ta dificil pa durante siman pa duna informacion.
Croes a papia riba e colaboracion cu tin entre LVV (Santa Rosa) cu DNM, Fundacion Parke Nacional Arikok y un parti tambe cu ta Aruba Birdlife Conservation. A sinta un siman y mey atras y siman pasa a sinta un biaha mas, unda cu a traha un draft, un protocol di e cooperacion estrecho cu tin cu e departamentonan aki, con ta bay ta trahando hunto pa por cuida nos medio ambiente.
Como resultado di e protocol aki, ya trabaonan a cuminsa, aunke e protocol no ta firma, pero delantando e protocol, trabaonan a cuminsa di scan e trayectoria caba. A cuminsa e prome 350 meter cu a wordo haci for di e caminda di Meiveld, patras di Codemsa, bay direccion San Barbola y den e area aki tur e gremionan, tur e participantenan LVV, DNM, Fundacion Parke Nacional Arikok, contratista y ekipo di DOW, a cana den e area aki, sondea wak matanan cu ta valioso pa por mantene. A identifica nan cu un cinta, pa ora cu e contratista haci su trabao, e no ranca nan bay cu nan. Ademas tambe, fundacion Parke Arikok a scan e area pa fauna, pa wak si nesting round di shoco, otro tipo di parha y reptil cu por tin den e area y no a haya nada significante den e prome 350 meternan.
Tin algun trabou cu mester bay haci pa e matanan cu a haya cu ta importante pa e organisacion cu ta cuida nos medio ambiente, pa cual esaki lo keda den man di Santa Rosa segun Marlon Croes di DOW.
El a splica cu tin cu haci cierto trabaonan pa realoca e matanan. Matanan cu a identifica lo wordo coba rond di dje, saca cu su rais, cu su tera rond di dje y e ta wordo transporta pa Santa Rosa, unda cu ta bay den un nursery, caminda cu e lo wordo cuida, unda cu e mata lo wordo reuza otro caminda of den e proyecto aki mes. Pa por yega na esey, ekiponan mester por yega na e matanan pa por sak’e. Esey a cuminsa diabierna mainta, segun palabracion, a traha e caminda pa e ekiponan por yegam pa por haci e trabao. Esey a tuma luga. Tin e situacion bao di control. Fundacion Parke nacional Arikok a haci su trabao un tiki mas leu. Nan a bay 150 meter extra y akinan si nan a haya algun nesting ground di shoco. Pa ser exacto nan a haya 7 y e contratista a marca diabierna y diasabra ultimo e caminda, pa por identifica y determina si nan ta cay den e caminda si of no y a base di esey dialuna mainta 7’or, e ekipo ta keda swipe e area. A base di esey ta determina si e ta den e trayectoria. Si ta asina, nan ta haci tur trabao necesario pa colecta y realoca e parhanan aki, cuida nan y despues laga nan bay bek den naturalesa.
Tambe nan a haya algun mata, cu pa e team, ta relevante pa tene. Nan a haya Wayacanan chikito. A haya shimarucu, tamarijn, appeldam, calabas. Tur eseynan ta matanan cu a identifica, pone un cinta riba nan, pa cuida nan y pa despues realocanan. Esey ta e trabaonan cu a haci cu a sosode den e siman cu a pasa y e siman cu ta bin aki, ta bay sigui scan e area 350 meter atrobe y identifica kico ta e trabaonan necesario. Ta un cooperacion estrecho entre e ekipo cu ta forma di DNM, LVV, Fundacion Parke Nacional Arikok, DOW y e contratista su mes. Esey ta algo cu ta haciendo basta estrecho pa por construi e caretara aki, unda cu nos ta cuida nos medio ambiente, nos flora y fauna pa Aruba. Naturalmente ta haya hopi reclamo, keho, pesey e team tabata tey na e conferencia tempran, pa hende sa kico ta e strategia di e ekipo ta. Con nan ta traha proactivo pa cuida e parha, cuida e matanan cu ta necesario y a base di esey tin cu acerca e comunidad. Awor aki ta acercando e comunidad den un escala mas grandi, completo. Pero pa e bario di San Barbola, ora cu e trabaonan cuminsa mas intensivo, despues cu reaoloca mata, despues di realoca e parhanan, lo bay ta haci trabaonan mas intenso pa cleanup e area pa por cuminsa traha e fundeshi di e caminda.
Ta bay informa e comunidad, e vecindario di San Barbola y rond di dje, den un townhall meeting cu lo tuma luga diahuebs, dia 1 di Juni, di 7’or pa 8’or di anochi, den Centro di Bario Dakota. Un y tur ta cordialmente invita pa atende e townhallmeeting pa informacion y si tin pregunta por haci esey di biaha pa e ekipo cu lo bay tin presente y por contesta tur pregunta y e preocupacionnan cu tin.