Un siman despues di e premiere mundial di e documentario ‘I can’t be more” na Corsou, a tene un Aruba premiere di e documentario aki, dedica n’e trabaonan di e conocido personahe Alice van Romondt, den Cas di Cultura.
Nos a combersa cu e cineasta Rebecca Roos, a produci e documentario aki y segun su mesun palabranan, a wordo selecta pa e festival di pelicula na Corsou.
E ta sigui splica cu hopi hende di Aruba a yama pa bay Corsou. Roos a indica cu e no por manda su hendenan paga un dineral djis pa bay wak un pelicula na Corsou. E ora a dicidi pa pone un Aruba-premiere, un solo showing un siman despues di e premiere mundial.
Mirando cu Alice su trabao den arte ta e enfoke den e documentario aki, banda di tur e otro cosnan cu e ta haci, hunto cu Alida Martinez, a dicidi di tuma un seleccion di su coleccion priva di arte cu ta masha importante, no unicamente pa Aruba, pero tambe p’e region, caminda cu nan a pone un exposicion pa un anochi so.
E DOCUMENTARIO
E documentario ta bay riba e persona Alice van Romondt. Alice ta un persona cu tra’i cortina, den hopi organisacion, den hopi fundacion, ta hopi importante. Pero e tambe ta e prome director di Biblioteca Nacional, tempo Aruba a haya su status aparte. E t’esun cu a traha e bibliotecanan nobo na Aruba. E ta e prome secretaria di Ministerraad femenino den reino. Alice a haci hopi cos. Pero su interes pa arte, cultura, asunto social y naturalesa, semper tabata grandi. E ta haci masha hopi trabao boluntario den e areanan ey.
Rebecca Roos, como cineasta, hopi lihe a topa Alice den su funcion e tempo ey como miembro di directiva di Prins Bernhardfonds y por a mira su dinamismo, ta mira cu e ta pensa cu bo. E no ta soluciona cos p’abo, pero ta mustra bo e camindanan cu bo por cana, cu por ta abo no a mira. Asina pa hopi hende, manera Roos mes, ta un persona hopi importante.
Pero hopi biaha e ta traha pa otro haya e atencion y e mes no. Roos a indica ta tempo pa Alice haya su atencion.
DISPONIBEL RIBA PANTAYA
Segun Rebecca Roos, tin un caminda pa cana prome. Ora cu saca un documentario y mirando cu Roos ta ambicioso, e ta spera cu e haya un acogida internacional, esey ta haya via festival di pelicula. Pero e festivalnan di pelicula tin regla. Asina tin cierto reglanan. E premiere mundial a bay Corsou, esun nacional a bin Aruba. E proximo paso mester ta cauteloso. E no por tire online di biaha pa hende wak. Un canal manera Telearuba ta online tambe por ehempel. Ora cu tur hende wak e caba, Roos ta perde e oportunidad pa bay otro caminda.
Awo ta purba pa ‘submit’ na festival, mira si kier seleccion’e, cual lo costa placa. Tin festival por nada, pero tin di $100 tambe. Ta un averahe di $30 di festival, cual ta hopi. E ora tin di mira si tin un interes internacional, cu ta mustra Aruba tambe di un otro banda.
APOYO N’E ARTE
Mester imagina ora COVID a cuminsa, tur diripente a realisa con importante arte, musica, obra di arte, pelicula, television, ta pa nos, segun Roos. COVID a pasa y nos kier lubida y diripente no tin placa mas pa duna e cosnan aki. Mientras cu durante COVID esey a mantene nos sano. Arte ta masha hopi importante, creative industries ta hopi importante. Tur camber di hotel tin por lo menos un cuadra den dje. Imagina si djis bisa e hotelnan cu mita di eseynan mester ta di artista Arubiano, e ora tur artista Arubiano por biba di nan arte.
