A.T.A. ta lansa e proyecto piloto ‘Aruba Quality Seal’

0

Durante e fase di investiga y colecta data pa asina formula un programa pa midi y reconoce calidad di producto y servicio, mas cu 12 otro programa internacional a wordo evalua. Ademas, diferente dialogo cu expertonan y participantenan potencial a tuma lugar, pa asina desaroya un lista di criteria cu ta aplicabel pa ‘Aruba Quality Seal’, cual ta criteria lo uza pa haci check na diferente negoshi. A.T.A. a contrata QESH, un entidad di auditoria localisa na Aruba, pa ta e partido independiente cu ta conduci e checkmento y establece -a base di cumplimento- ken ta bin na remarke pa un seyo ‘Aruba Quality Seal’. 15 Diferente companianan, den sectornan di ‘retail’, restaurant y actividadnan, lo forma parti di e etapa piloto y a ricibi mas informacion siman pasa. Ta anticipa cu e periodo piloto lo tin un duracion di 6 pa 9 luna.

Profesionalismo y standard den industria turistico
A.T.A ta sigura cu e ‘Aruba Quality Seal’ lo bira un herment di desaroyo den negoshi y asina establece y yuda mehora e nivel di profesionalismo y standard den nos industria turistico. E sistema aki ta diseña pa promove y midi calidad y nivel di servicio di negoshinan, cu meta pa nan (sigui) satisface y hasta surpasa expectativa di consumidornan.

E rason principal cu a lansa e proyecto piloto aki ta pa asina sigura cu e ta facil y practico pa e companianan permitiendo cu consumidornan por reconoce e balor cu ta wordo brinda na e establecimientonan aki. Durante e etapa piloto lo evalua e sistema, con practico esaki ta. Aunke cu e enfoke di e programa pa awo lo ta riba restaurant, actividad y retail, den futuro lo por añadi mas sector.

QESH, un compania cu ta certifica na Aruba pa mas cu 25 aña, lo ehecuta e parti di auditoria den un forma imparcial, y lo opera tambe manera consehero pa asina sigura cu e proyecto ta uno integro y productivo. Despues di e programa, A.T.A. lo lansa e ‘Aruba Quality Seal’ oficialmente na escala nacional.
-FIN-

Comments

comments