Dialuna a tuma luga e tratamento di e Presupuesto Supletorio, y esaki a sigui te den oranan laat di anochi. Esaki ta un decision tuma door di e presidente di Parlamento, mr. Ady Thijsen, hunto cu e lidernan di fraccion.
Segun Sr. Thijsen, no ta bon pa cuminsa trata cu presupuesto 2019 y ainda e presupuesto supletorio 2018 no ta cla. E tabata ta un sacrificio, pero satisfecho. December ta un temporada hopi druk, pero como parlamento nan ta bisa gobierno cu nan kier tur e documentonan trempan, pa asina por planea bon y duna e parlamento oportunidad pa haci nan pregunta. Pa nan por hiba un debate tambe y na nivel.
Dialuna a trata Presupuesto Supletorio y diamars lo trata e Sociaal Crisis Plan, hunto cu e presupuesto di Minister Glenbert Croes, cu ta Asuntonan Social y di Labor. E dosnan a bin, y segun Sr. Thijsen, ta dos presupuesto apart (Supletorio y Sociaal Crisis Plan) y e parlamentarionan en berdad no a haya mucho tempo pa haci pregunta ariba nan, pero ta algo cu nan ta conoci cun’e caba. Y e parti di Sociaal Crisis Plan ta bay den combinacion cu loke ta e presupuesto di Asuntonan Social y Labor.
Tin biaha lo mester sacrifica un poco, pero e idea no ta pa bulldoze tur cos. P’esey a para firme pa cada minister wordo atendi apart y asina cada parlamentario haci uzo di su 20 minuut pa haci pregunta durante e prome rond y 10 minuut den e di dos rond. Antes tabata tin menos tempo pa cada minister.
Diaranson lo trata presupuesto di Infrastructura y Medio Ambiente, Sr. Otmar ODuber y diahuebs e presupuesto di minister Dangui Oduber, di Turismo, Salubridad y Deporte na turno. Diabierna lo ta na turno e minister di Husticia, Sr. mr. Andin Bikker. Y dialuna lo trata presupuesto di Enseñansa, di minister drs. Rudy Lampe hunto cu esun di minister di Transporte, Sr. Chris Romero. E presupuesto di Finanza lo keda pa casi ultimo y lo cera cu esun di Ministerio di Asuntonan General, Sra. mr. Evelyn Wever- Croes.
Hopi ta e parlamentarionan cu a puntra e pakico nan no por haya e contestanan por escrito. Y segun e presidente di parlamento, Sr. mr. Ady Thijsen a splica cu a keda dicidi di haci’e verbal. A bay di acuerdo den parlamento, unda cu e ta presidente di parlamento y e ta dirigi e reunion. Pero e fraccionnan a bay eens, cu un cos ta cla, cu pa loke ta tratamento di presupuesto 2019, niun pregunta lo haya nan contesta verbal, manera den pasado.
Parlamentarionan a puntra uitdrukkelijk pa e Presupuesto Supletorio 2018 y esun di Sociaal Crisis Plan, si por contesta verbalmente, pa no stroba e presupuesto 2019. Ta pa e dosnan ey a pidi un excepcion y parlamento a tuma e decision ariba esaki.
Cu e fraccion di AVP den oposicion no ta di acuerdo, ta comprendibel pa nan, ya cu nan lo kier mas tempo. Esaki tabata den pasado, pero e no mester bira un Modus Operandi. Pero decision a cay, aunke esaki no ta e idea cu ta bay traha cun’e, segun e presidente di Parlamento, Sr. mr. Ady Thijsen.
E t’ey pa hopi tempo caba, y Sr. Thijsen a bisa cu e tin hopi aña den politica. Tin biaha mester ta flexibel pa mantene ordo. Tur mester traha hunto na bienestar di e pueblo di Aruba. Diferencia di opinion ta sano pa democracia. Ora di haya critica, mester acepta esaki tambe. Cada decision tuma tin su motibo su tras. Pero e intencion ta loke ta conta.