Minister di Husticia y Asuntonan Social sr. Rocco Tjon a bishita Famia Planea Aruba (FPA) kende ta miembro di International Planned Parenthood Federation (IPPF). Durante e bishita aki a reuni cu e director general di IPPF, Dr. Alvaro Bermejo, kende pa prome bes den 50 aña a bishita Aruba. Gobierno di Aruba ta comprometi pa aloca mas fondo pa Famia Planea Aruba (FPA) mirando cu nan tin un rol importante pa loke ta provee anti-contraceptivonan, counseling y educacion di salud sexual. Di e forma aki ta yuda mitiga problemanan social, y alabes contribui na e bienestar di nos hobennan.
IPPF a compromete nan mes pa sigui sostene Aruba, pues nan ta un partner hopi importante riba e tereno aki, caminda nan ta brinda asistencia na Aruba. Na mes momento, di parti di Ministerio di Husticia y Asuntonan Social a percura pa den presupuesto 2024, aloca mas fondo pa FPA. FPA tin un rol hopi importante pa loke ta mitiga problemanan social, pues casonan cu eventualmente lo por bira un problema social, door di brinda counseling y educacion di salud sexual.
Presente na e presentacion di awe tawata un otro partner, HAVA, kende a brinda diferente informacion riba diferente topico. Remarkabel ta cu e representante di IPPF a indica cu e motibo principal pa nan bishita pa Aruba ta, e señalnan positivo cu nan ta hayando di FPA, pues nan mes kier presencia con FPA ta brinda asistencia, principalmente riba e parti di educacion sexual, pa asina nan por sigui sostente FPA pero alabes percura pa FPA por fungi como un modelo cu nan por replica den nos region.
Esaki ta yena nos di gratitud, mirando e motibo principal pa nan bishita na Aruba ta a base di Aruba su bon representacion internacionalmente. Nos ta gradici henter e ekipo di FPA, pa e tremendo trabou cu nan ta eherce, apesar di ta un ekipo chikito, nan ta sigur un ekipo hopi dinamico. E impacto cu nan tin pa percura pa e bienestar di nos hobennan ta uno inigualabel.
