A reuni cu Parlamentaria Europeo sra. Samira Rafaela riba posibilidadnan pa Aruba atraves di Union Europeo (D66)

Manera ta conoci partido MEP a sostene e candidatura di sra. Samira Rafaela pa Parlamento Europeo. Sra. Rafaela a wordo eligi cu voto preferencial y ta forma parti actualmente di Parlamento Europeo. Presencia di sra. Rafaela den Parlamento di Aruba ta muestra di su intencionnan honesto pa por significa algo pa e islanan atraves di Union Europeo.

POSIBILIDADNAN PA ARUBA
Sra. Rafaela a splica cu e ta wak hopi posibilidad pa Aruba atraves di proyectonan cu ta enfoca riba technologia y innovacion. Na mes momento tin posibilidad tambe riba tereno di economia y deporte. Hunto cu sr. Eddy Paris e ta trahando caba pa haci’e posibel pa Aruba haya mas accesibilidad na proyectonan chikito y grandi cu ta brinda acceso na deporte y empleo pa hobennan di menos recurso.

ASISTENCIA EN CUADRO DI SITUACION VENEZUELA
Pa loke ta e situacion di Venezuela Sra. Rafaela a entrega un mocion den Parlamento Europeo pa atraves di fondo, na un manera structural, brinda ayuda na e islanan den Reino, pa mitiga e efectonan cu e islanan ta experencia debi na e situacion di Venezuela. Sra. Rafaela a haya contesta caba riba su peticion y actualmente tin un analisis andando con e ayudo aki por wordo brinda na un mihor forma. Intercambio di plannan entre gobierno di Aruba y Hulanda ta essencial den esaki.

PA CONCLUI
Sra. Rafaela tin dos cartera den cuadro di su trabounan cual ta asuntonan social y asuntonan di empleo bou hobennan. Den cuadro di esaki e ta hasi hopi esfuerso pa stimula democracia bou hobennan y lo wak posibilidadnan pa atraves di Union Europeo haya fondo pa realisa e proyecto di “ProDemos”, cu colega Edgard Vrolijk ta bezig cune.

Nos tin contacto regularmente cu sra. Rafaela riba topiconan cu nos tin en comun den Reino. Nos ta orguyoso cu sra. Rafaela su intencionnan honesto pa yuda nos surpasa e retonan cu nos ta wordo confronta cune.

Comments

comments