A prolonga medida pa un siman mas pa asina tin miho bista, specialmente riba variante nobo di e virus

“Riba un dia nobo awe, un siman nobo,  un luna nobo, cu oportunidadnan nobo y ohala esaki tambe ta e luna cu nos por domina e plamamento di e virus di Covid un poco mas miho,” prome minister Evelyn Wever-Croes a expresa durante conferencia di prensa dialuna mainta dunando informacion riba diferente topico cumisando cu e Covid resumen di januari 2021.

E prome luna di aña tabata bastante preocupante pa loke ta Covid mirando cu nos a drenta e di tres ola. Nos a cuminsa e luna cu 281 caso y cierto momento a yega te na 624 caso, anto ayera e luna a cera na 342 caso activo. Hasta nos a constata e presencia di e variante Ingles na Aruba riba 25 di januari. Dos indicador ta hopi importante den maneha e crisis akinan segun e mandatario ta splica: uno ta e cantidad di caso nobo pa dia, cu awor ta na un averahe di 35 caso nobo pa dia apesar cu ta menos cu den curso di januari, e ta keda preocupante segun gobierno.

E di dos indicador ta ocupacion den hospital: a cuminsa luna cu 7 persona y cierto momento a yega te na 34, y awor e ta na 18 persona. E intensive care tabata preocupante tambe pasobra a cuminsa aña cu 2 anto a yega te na 12 cual ta hopi pa Aruba, y awor nos ta na 10 persona den intensive care.

Si conta e total di casonan nobo desde prome di januari 2021 pa awor tabata tin 1,500 hende cu a wordo contagia cu Covid y casi 20 mil test a wordo haci. Lamentablemente 10 persona a fayece y cu tabata tin Covid, ta na september 2020 cu october 2020 nos a mira mas cu esaki, pues e cantidad di 10 den luna di januari ta hopi halto pa Aruba tambe.

Den januari tambe mester a aplica reglanan di ordo publico mas estricto cu lo a keda na vigor te 31 di januari, entre otro e toque de queda y otro ta e verbiedsverbod, a dicidi di prolonga esaki pa un siman pa haya un miho bista specialmente di e entrada di variante Ingles, y despues di resultadonan di test ricibi awe for di Hulanda lo sa mas tocante e parti aki.

E desaroyonan den januari den general a causa hopi reto y preocupacion, cual a trece tambe costonan adicional, gobierno mester a pone mas hende pa haci e trabao y hopi mas atencion y energia a bay na esaki. “Mi mester bisa si, danki na nos frontliners nos profesionalnan tanto riba tereno di cuido y ordo publico, nos por a logra mantene e plamanento di e virus na un minimo, y danki na nos hendenan, nos ciudadanonan cu den gran mayoria a atende na regla y protocolnan.”

E virus t’ey y mester sigui cuida en todo caso te ora logra vacuna gran parti di nos comunidad segun prome minister a declara. “Ningun hende ta bay wordo obliga pa tuma e vacuna pero esnan den grupo di riesgo sigur ta wordo conseha pa tuma e vacuna.”

 

 

Comments

comments