Un tema sigur cu den comunidad ta keda un pregunta, cuanto tempo ta bay tuma pa un college di hurista pa cuminsa evalua nos leynan, pa asina ora duna castigo esaki por cana un caminda mas miho. Sr. mr. Andin Bikker, minister di Husticia, ta splica mas.
Den e programa di gobernacion, mr. Bikker hopi biaha a bisa cu e leynan di un pais, ta mescos un software pa un computer. Ora cu bo no update bo leynan, bo ta keda hopi biaha cu bo leynan ta bin confronta, net ora cu bo no ta spera cu e leynan ta anticua. P’esey den e programa di gobernacion nan kier bin cu’n academia di ley, pa bin cu mas hurista, pa yuda update nos leynan. E ta un experticio adicional, ora cu bo caba di studia na Universidad di Aruba of di Hulanda, esey no kiermen cu bo tin experticio adicional pa propone concepto di ley. Esaki ta un experticio cu lo kier siña nos huristanan, via un academia di ley.
Apart di esey, pa loke ta e tematica di leynan penal y codigo di procedemento penal, tin un comision di expertonan, cu e.o. St. Maarten, Corsou y Hulanda ta haci uzo di dje. Y ta nan a traha tambe ariba e propuesta di codigo penal cu a tarda un tiki pa drenta na vigor. El a wordo trata na 2012, a drenta na vigor na 2014. Awo nos ta na 2018 y ta bin confronta cu atrobe ta ripara cu ya caba cu riba cierto aspectonan ta anticua.
Otro luna, dia 17 di juli, mr. Bikker lo ta den e Justitiële Vierlanden Overleg, unda e 4 ministernan di husticia di Reino Hulandes, ta reuni cada 6 luna. E mandatario lo pone esaki riba punto di agenda. E ley di Codigo di Procedemento Final y Codigo Civil, ta wrodo yama Concordant. A base di constitucion, mester purba haya un tipo di consensus , door cu tin un corte comun, no por bay mucho for di pas, un cierto concordancia entre e leynan. Tin autonomia, dor cu tin un corte comun, pa un ley ariba e topiconan aki, ta concordante cu otro. Pero e mandatario lo propone esaki como un punto di agenda y bin cu comision pa rapidamente traha ariba dje. Parlamento tambe ta bezig cu propuestanan di iniciativa di castigo minimo. En todo caso, lo bay duna prioridad na dje.
Pa loke ta e tempo cu esaki por dura, e mandatario a splica cu ley den su totalidad, p.e. un codigo penal ta tuma su tempo. Pero ora ta bin ariba puntonan chikito, pero toch di impacto grandi, pa cual kier revisanan. Prome cu December, e mandatario lo ta presentando un Verzamelwet hunto cu otro ministerionan, pa nan por update ariba e puntonan di e Codigo Penal y asina no tin nodi bay den proceso cu normalmente ta dura paar di aña. December ta e meta pa cual lo kier haci algun update relativamente simpel, pero cu’n impacto positivo y grandi.
Na december, cu secretario Knopps tabata di bishita na Aruba, el a compronde cu e deseo di mr. Bikker ta pa update nos leynan di Aruba rapidamente. Y Knopps a ofrece un capacidad di sosten cu experticio for di Hulanda, si mester di esaki y esey tambe por haci uzo di dje.
Dos siman pasa mr. Bikker a manda pidi asistencia pa e ley cu tin embergadura pa Aruba, di e impacto di e leynan di proteccion di data personal, cu a drenta na vigor 25 di mei for di Union Europeo y cu tin impacto tambe pa Triple A, KLM y nos hotelnan, pa cual a pidi asistencia pa experticio di Hulanda, pa yuda Aruba cu esey, segun Sr. mr. Andin Bikker, e mandatario encarga cu Husticia a splica.