Pa loke ta e Contracto Colectivo cu STA a logra cera cu Caribbean Palm Village Resort, tabata tin su retonan, segun Sr. Diego de Cuba, lider di sindicato STA.
Nan a tene consideracion cu e situacion di e hotel. No ta asina cu ta pusha e hotel den un skina unda cu nan no por sali. Y nan final di cuenta, e trahadonan ta keda mal para, pero a logra yega na otro. E contracto colectivo ta contene mayoria di e cosnan cu ta necesario, manera e salario di e trahado, christmas bonus, un performance bonus, nan tin plan di spaar, nan spaargeld y awor a logra di bin cu’n lumpsum pa nan, cu lo wordo reparti e aña aki, den dos biaha. E prome ta na juni, e di dos na december. Otor aña e lo ta parti den tres.
Tin hopi hende den timesharing pero esaki ta birando menos. Y esey ta un reto pa e hotel, ya cu e entrada di e hotel tambe ta baha. Apart di esey tin inversionnan grand cu mester a wordo haci na e hotel tambe ya cu mester mantene e calidad na halto. Pero a pesar di esey toch a logra yega na algo cu ta beneficia e trahadonan.
Manera STA a bisa, e contracto ta uno bon, e ta un CAO cu’n duracion cortico di 2 aña. Ya otro aña na februari lo negocia un CAO nobo. Den e bida di timesharing e presupuesto mester wordo traha di hopi delanta y Caribbean Palm Village no tabata un excepcion.
Pero pa loke ta e CAO, e mayoria absoluto a bay di acuerdo cu e CAO aki y asina pas laboral por reina atrobe. E motibo pa cual a firma pa solamente 2 aña, ta pasobra cu tin cu bay papia over di e aumentonan general y a wak cu no tin espacio pa esey aworaki. Y no ta prudente pa sigui pusha e compania, pa cual a bin cu lumpsum pa tene tur hende contento pa loke ta e resto di aña cu ta sigui, te cu 2019. Y na Februari 2019, STA lo sinta na mesa un biaha mas cu Caribbean Palm Village, pa un CAO mas largo. Pero esey ta depende di e situacion di e hotel, ya cu e ‘cost of doing business’ na Aruba ta bastante pika. Tin hopi factornan cu mester tene cuenta cun’e. Pero na februari lo wak con e situacion ta y si e situacion ta duna, e ora lo por press un tiki mas duro, segun Sr. Diego de Cuba, di sindicato STA.