Pa loke ta e situacion na airport, esaki a wordo señala a problematica aki for di hopi tempo caba. Naturalmente tin combersacionnan andando ariba esaki. Sr. Roderick Croes, director di Cuerpo di Aduana ta amplia mas ariba esaki.
Mester tene cuenta cu Belasting, Economische Zaken y pa proteha nos comerciantenan di Aruba, a exigi pa hendenan cu ta bin cu productonan, cu caracter comercial, pa nan presenta cu nan KvK y pa haci uzo di un broker pa klaar in e productonan na Douane.
Douane su tarea ta pa cobra invoerrechten y accijnzen. Si nan a declara e producto, ta cobra e invoerrechten, Douane su trabao a caba. Pero, esaki lo perhudica e comerciantenan pafo. Pasobra cu e personanan aki a pasa cu e productonan, a paga invoerrechten so, nan no ta paga belasting, no ta paga Kvk, no ta uza un broker, pasobra nan mes a haci’e caba. Pa esaki Douane a bin cu sistema cu ta pidi hendenan cu ta yega cu productonan di caracter comercial, a pidinan pa bin cu KVK, y haci uzo di broker pa competi cu e otro nan. Te akinan e trabao di Douane.
Despues di esey ta bin belasting y Economische Zaken. Aworaki cu tin exigencia di KVK, e ora Douane tin cu sali for di punto di bista cu e hendenan ta cumpli cu nan leynan. E KVK tambe por duna e informacion na belastingdienst of vice versa, pa wak ken tin negoshi. Esey Douane ta purbando di haciendo, pa elimina e negoshi ilegal.
Sr. Croes a sigui bisa cu na airport, e personal ta haci nan best pa traha miho posibel. Nan tin falta di personal y tambe e ziektemelding ta halto, pa cual e trabao ta cay ariba esunann na pia di trabao. Ta purba na tene cuenta cu e peticion di minister pa baha e gastonan. Ta purba di wak con ta traha, profila y wak ken ta esunnan cu ta wordo controla. Depende di kico e risico, di unda e vuelo ta bin, tur esey ta e manera cu tin pa profila y bisa con grandi e risico ta. Den e mesun vuelo ta haya cu no ta controla tur hende. Ta haci un prescreening, di ken ta bin mas biaha, cu ta indicacion di negoshi y tambe e aparato di scan maleta, cu awo tin dos di nan.
E luga unda Douane ta trahando awo no ta mucho adecua. Den grensbeveiliging nan tin un werkgroep cu ta trahando ariba e parti di Luchtvaart cu ta indica puntonan cu por drecha y kico por haci. Si bay scan tur hende, ta bira mucho hopi. Tin tres te cuater categoria, cu ta esunnan cu ta paga di nan mes, cu no tin nodo di checknan. Tin di otro paisnan, cu ta pasa den e Groene Kanaal, cu ta esunnan cu no tin nada di declara. Net e grupo aki ta esun cu lo mester wordo controla. Y tin esunnan cu Douane ta laga kies pa controla.
Aeropuerto tambe a indica cu nan ta bay expande y den expansion tambe a hinca e parti di e Comision di Grensbeveiling cu ta expresa deseo di kico ta bin aden. Prome ta pa expande e parti di salida. Den e parti aki tin algun cambio ta bay bin y un di e cambionan positivo na caminda. Douane lo haya un post na un porta cu tur cos cu ta drenta of sali di airport, sushi, carga, hende ta pasa door di un porta. E ora ta haya un post eynan, unda cu ta sigur cu tin control central ta tuma luga. Te asina leu, Sr. Roderick Croes, director di Cuerpo di Aduana.