Diferente departamento manera City Inspector, Serlimar y Infra Aruba hunto cu Cuerpo Policial tambe, a inicia un accion di entrega di saconan di plastic na tur esnan cu ta kampando na beach. A cuminsa den e area di Arashi caminda cu despues a sigui pa Nikki Beach y tambe Cas di Gobernador bai ariba y despues a bai Savaneta y tambe na Baby Beach Sanicolas. Tur hende a haya dos saco pa nan por pone nan desperdicionan den dje p’asina Serlimar por pasa recoge esakinan den un forma mas regla. Robby Rosel di City Inspector ta sumamente contento di por traha hunto cu Serlimar p’asina por reparti e saconan aki y asina mantene e beachnan limpi. Mas cu claro manera semper City Inspector ta bisa cu saconan di plastic aki ta pa tira tur sushedad pero laga nos no bai laga sushinan, manera saconan di ijs, saconan di man bay lama pasobra esaki ta fatal pa nos bida marino y tambe cupsnan di foam. “Ban trata di mantene e parti aki limpi, pasobra e no ta pa nos so, sino pa nos bishitantenan tambe por gosa di nos beachnan limpi y bunita”, Rosel di City Inspector a sigui bisa. Tur dia trucknan di Serlimar ta pasa pa recoge sushi di esnan cu tin bari y tambe si nan pone nan desperdicionan canto di caminda, Serlimar tambe ta recoge esakinan y na final di e periodo di campamento, cu ta dia 28 di April, City Inspector e ora ta pasa controla pa wak si tur tur caminda a keda limpi manera a wordo palabra cu esnan cu a ricibi permiso pa kampa banda di beach. Manera ta e caso tambe City Inspector a bisa cu ta prohibi pa trece paletnan pa traha campamentonan y mester bisa cu nan ta contento cu esnan cu a bin campa a cumpi cu esaki bon y City Ispector ta aplaudi esaki. Alavez mester bisa tambe cu e comportacion di e campadornan a bay fantastico.