Minister Otmar Oduber ta comenta tocante e desaroyonan pa cu e Saliña y wetlands unda tabatin trabounan sin permiso andando.
Minister Oduber ta splica cu nan a tuma nota di cierto trabounan cu a tuma luga na Saliña. Tin videonan di e trabounan aki cu tabata circula den oranan di atardi y anochi. Dienst Openbare Werken (DOW) ta ocupa cu un grupo cu aparentemente a wordo identifica cu lo mester a haci e trabounan aki. Esaki ta trabounan cu a wordo haci sin ningun clase di permiso di Directie Natuur en Milieu (DNM), Directie Infrastructuur en Planning (DIP), ni di DOW. Nan a cuminsa atende cu e personanan cu tabata haciendo e trabounan aki y e Minister ta den espera pa un rapport di esaki wordo traha. Segun e Minister, trabounan cu tabata tumando luga eynan no tin nada di haber cu e proyecto di construccion di casnan, cual a wordo cancela y no ta bay door mas. Tin dos entrada di Malmok pa yega na e Saliña aki y DOW mester a percura pa pone barancanan eynan despues cu nan atende cu e personanan cu a comete e dañonan na e Saliña.
E Minister ta lamenta con tin personanan cu no ta consciente di con hopi nan ta purbando di proteha e Saliña y e wetlands. Ta mustra cu e personanan responsabel kier a burla di e sistema di control di e departamentonan mirando e orario cu nan a scoge, cual ta orarionan cu e departamentonan aki ta cera. E accionnan aki ta mustra e malicia cu tabatin su tras. Na e momentonan aki e personanan responsabel ta obliga pa tapa e buraconan y drecha esaki. E Minister a confirma cu nan lo haya multa p’e dañonan aki.