Compromiso di Gobierno ta pa por crea e posibilidad pa 1000 vivienda wordo construi. Den cuadro di esaki a yega na e punto unda cu a otorga 246 persona e oportunidad pa por traha y crea nan mesun hogar, conforme un proceso transparente. Na e ocasion Minister President sra. Evelyn Wever – Croes, Minister di Infrastructura sr. Otmar Oduber y director interino di DIP sr. Errol Sjak-Shie, a hiba palabra.
E criteria pa bin na remarca cu a aplica den e proceso:
Cada persona cu a wordo yama pa nan erfpachtsovereenkomst, a wordo selecta a base di un sistema ‘first in, first out’ (FIFO). Esencial ta pa indica cu e personan aki tambe a cumplí cu otro rekisitonan. E lista di personanan cu a haci peticion pa tereno ta hopi largo, sinembargo awo na un forma transparente ta atendiendo cu esaki. Na maart a haci conoci y na luna di mei a entrega 364 percela pa construccion di cas. A percura pa atende cu esnan cu tin mas cu 15 – 20 aña wardando te cu aña 2000. Na e momentonan aki ta den e proceso entre añanan 2000 te cu 2005, pa cual dialuna atardi a otorga casi 250 tereno. Asina poco poco yegando e meta di 1000 tereno pa aña cu mester por wordo haci disponibel pa nos comunidad.
Den e proceso cu ta andando a percura pa terenonan wordo habri na Sero Biento, Sabana Liber, Buena Vista, Turibana entre otro. Na e momentonan aki den e proceso nobo cu ta andando, DOW ta den fase di ‘aanbesteding’ y trabounan ta cuminsa na Boroncana.
Pa ta mas specifico:
E proceso nobo cu ta continua despues di esaki, lo cuminsa cu proyectonan na Boroncana, Calabas, Jaburibari, Jara, Macuarima, Noord, Santa Cruz, Sjabururi, Tanki Flip y Tanki Leendert. E maneho ta pa distribui rond di nos isla mas cu ta posibel locual ta tumando lugar, pendiente pa cuminsa otro aña cu e proyectonan na Tarabana, Eagle, Sero Colorado y e di 2 fase na Jaburibari.
Pa locual ta e aspecto di proteccion di naturalesa cu ta aplica den e verkavelingsplan nan aki, 20% di e area mester wordo manteni como area berde.