Despues di e puntonan di agenda regular di asamblea y e prome sorpresa di mainta, a yega na e punto final di un reunion hopi special. Pa prome biaha den historia, Comite Olimpico Arubano (COA) a nombra un persona como “Miembro Honorario”. Esaki ta un distincion unico, cu lo bay wordo reserva pa esnan cu a logra di tin un impacto extraordinario riba deporte na nivel Olimpico na Aruba. Den e caso aki, a nombra Sr. Jesus Leon Elias “Chu” Halabi como e prome Miembro Honorario di COA.
“Shonnan, pa purba resumi tur e logronan y contribucionnan di Chu durante e ultimo cuater decadanan lo hiba nos te den oranan laat di atardi. Sinembargo, di e IMPACTO di su dedicacion no por existi e mas minimo duda! E ta parti di e fibra di nos organisacion, ta refleha den e aspiracion di nos atletanan, y ta wordo sinti den e orguyo colectivo ora cu Aruba ta wordo representa riba e podio mundial.” Asina ki Secretaria General di COA, Nicole Hoevertsz a expresa den un discurso hopi personal y autentico, unda e la purba di contene su emocionnan.
Chu su legado ta uno cu posiblemente nunca lo por wordo iguala, no solamente pa kico tur e la logra haci den su mas di 40 aña di compromiso y dedicacion pa deporte na Aruba, pero sin mas su berdadero amor cu ta carga den su curason pa tur cos deporte. Terminando su discurso Nicole ta expresa, “Awor cu bo ta bai hiba e titulo di Miembro di Honor, nos kier pa bo compronde cu nos ta desea pa bo sigui contribui na nos organisacion pa hopi aña mas. Danki, Chu, pa e casi 40 aña cu bo a sirbi COA y deporte en general. Nos ta sinti nos mes honra di tin bo mey mey di nos tur dia na COA”.
Prome cu e entrega di e plakaat, a logra soprende Chu, unda su famia cercano a bin pa asina por comparti e momento special aki.Presente durante e momento aki tabata yiunan Selimah y Ramsey, esposonan Jaime y Jourraine y nietonan Elias, Rania, Eva y Sarah. Durante e momento special aki, Nicole a gradici famia di Chu; “Masha, masha danki di a presta nos boso papa, suegro y opa. Nos ta semper testigo di e amor inmenso cu Chu ta sinti pa boso. Naturalmente riba e dia di awe un persona sumamente importante den boso bida, Mama Ivis, ta hasi tanto falta. Pero nos sa, y boso sigur ta sinti, e presencia spiritual di Mama Ivis y sa cu e ta compaña boso y sigur nos Chu tur dia.”
Den nomber di nos tur di Comite Olimpico Arubano, nos kier gradici Chu pa tur cos cu e la haci durante e utlimo 40 añanan y kico tur e lo sigi haci pa deporte na Aruba.
