Abordo di Zr.Ms. Groningen, dialuna 8 di april, a celebra un echo memorabel importante: hubileo 30 aña di colaboracion estrecho entre Merca y Hulanda riba tereno di lucha contra traficacion di droga den Region Caribe. E hubileo a tuma luga na Key West, Florida, na unda e sede di “Joint Inter Agency Taskforce South (JIATF-S)’ ta situa.
JIATF-S ta un organisacion unico internacional, guia pa Merca, cu ta trece hunto 19 pais y organisacion, tal manera FBI y DEA, den e lucha contra criminalidad relaciona cu droga den Region Caribe. Marina Real ta hunga un rol crucial den e organisacion guia pa Merca. Hulanda ya pa 30 aña ta forma Task Group 4.4 y ta provee diferente unidad pa operacionnan anti-droga. Como Comandante di e Forsanan Naval den Region Caribe Hulandes (C-ZMCARIB) Comandante Walter Hansen ta guia e grupo di tarea.
Comandante Hansen ta describi e colaboracion intensivo como un “bon matrimonio”, den cua e hubileo di 30 aña ta marca un echo memorabel importante. “Transito di droga ta un problema compleho cu ta rekeri un enfoke internacional”, segun Comandante Hansen.
E regreso di Zr.Ms. Groningen den Region Caribe Hulandes ta simbolisa e compromiso di Hulanda den e lucha contra traficacion di droga y criminalidad transfronteriso. Asina Defensa ta contribui na paz y siguridad den Region Caribe Hulandes.
