Prome Minister Evelyn Wever-Croes a declara cu e retonan financiero di Aruba ta grandi. E desaster financiero cu Gabinete Wever-Croes a hereda ta enorme. Lo tuma varios aña pa recupera completamente.
“Den nos prome aña di gobernacion nos no a logra soluciona tur problema. Pero nos a traha e fundeshi pa soluciona nos problemanan financiero y garantisa stabilidad financiero. No ta facil, sigur cu no. Pero ta necesario. Nos a pone metanan nobo nos dilanti y esaki mester hiba nos na e deficit di 130 miyon pa 2018 te na 25 miyon na 2019. Y nos a logra presenta un presupuesto pa 2019 cu ta demostra esaki. Ami ta considera esaki un logro enorme.
GASTO DI PERSONAL: E gastonan di personal ta baha pa prome biaha den hopi tempo. E rebaho ya 4 miyon florin. Esaki tampoco a bay facil. Nos mester a elimina practicamente tur vacatura. Esaki ta pone hopi presion riba e aparato gubernamental pasobra ningun departamento por tuma mas hende den servicio. Nos votadornan tambe ta reclama nos cu nos no a yuda nan cu trabou. Pero no ta cu nos no kier, ta cu nos no por. Nos tur mester hala faha mara awor, pa rescata nos pais pa nos yiunan y nan yiunan.
CAFT: CAFT kier mira e gasto di personal baha cu 14 miyon. Pero nos a bisa cu e rebaho di 4 miyon caba ta hopi dificil. Nos lo haci esfuersonan pa sigui baha e gasto di personal pero segun nos por. CAFT mes a permiti e gobierno anterior haci un desaster financiero ultimo 8 añanan y no por kere cu den 1 aña nos ta soluciona e problema. Nos lo solucione, pero gradualmente. Pa awor, maske cu nos mester a corta hopi den e presupuesto, mi ta hopi orguyoso cu nos a logra reduci di 130 miyon e aña aki pa 25 miyon otro aña”.