Autoridad di Venezuela a libera diaranson, 10 ciudadano Mericano cu tabata deteni den Helicoide, sede di e Servicio Bolivariano di Inteligencia nacional (Sebin) na Caracas, algun di nan door di a participa den un invasion paramilitar fracasa.
E salida di prizon di e Mericanonan aki ta pa anuncia liberacion na Merca, di e diplomatico Venezolano, Alex Saab, kende tabata encarcela iregularmente na Florida, bao acusacion di supuesto labamento di placa.
Entre esunnan libera, segun e medionan local ta reporta, ta Airan Berry y Luke Denman, ex-miembro di e Forsanan Special di Merca, kendenan a wordo hiba prizon na Venezuela na 2020, bao acusacion di complot pa deroca e gobierno di Nicolas Maduro.
“Ta complace nos e liberacion di nos defendidonan, e Mericanonan Airan Berry y Luke Denman, como tambe e resto di e Mericanonan inclui den e intercambio,” e organisacion yama “Coalicion p’e Derechonan Humano y Democracia,” a indica riba e red social X.
BIDEN A CONFIRMA E LIBERACION
A traves di un comunicado di Cas Blanco, presidente di Merca, Joe Biden, a confirma e liberacion di su compatriotanan. “Nan a wordo libera y nan ta biniendo cas bek (…) E individuonan aki a perde demasiado tempo precioso cu nan sernan keri y nan famianan a sufri tur e dianan den nan ausencia,” el a bisa.
Biden a agrega cu fuera di e liberadonan, nan a manda un fugitivo yama Leonard Francis, cu a huy di Merca prome cu por a sentenci’e pa su responsabilidad di un caso di soborno y corupcion. “El a wordo extradita di Venezuela pa e enfrenta husticia p’e crimennan cu el a comete contra Merca,” e mandatario a añadi.
E mandatario Mericano tambe a resalta e liberacion di otro 20 ciudadano Venezolano cu tabata procesa pa husticia di su pais, vincula na echo regular cu fin politico, kendenan ta agrega na otro cinco cu a keda den libertad previamente.
P’esaki el a resalta como “un avance positivo y importante” pa avansa riba e situacion y e dialogo politico na Venezuela, manera cu ta e “guia di ruta electoral” acorda p’e eleccion presidencial di 2024. “Nos lo sigui vigila esaki di cerca y nos lo tuma e medidanan apropia si ta necesario,” Biden a añadi.
GRADICIMENTO NA QATAR
Di su parti, e secretario di estado Antony Blinken, a detaye nomber di cuater di nan: Joseph Cristella, Eyvin Hernandez, Jerrel Kenemore y Savoi Wright. Ademas el a bisa cu di e otro seis personanan libera cu e no a identifica, dos di nan a expresa nan deseo pa keda den anonimato.
“Tur a bay cu siguridad fo’i Venezuela y pronto nan lo reuni cu nan famia y otro ser keri. Mi kier a gradici e gobierno di Qatar pa su trabao yudando na sigura nan liberacion. E siguridad di e Mericanonan rond mundo ta mi maximo prioridad como secretario,” Blinken a bisa.
INVASION FRACASA Y CONDENA
E detencionnan di Berry y Denman a sosode despues di e invasion fracasa arma den e costa centro norte di e pais Sur Americano, denomina Operacion Gedeon, cu a tuma luga dia 3 di mei 2020.
E invasion cu, di acuerdo cu autoridad Venezolano tabata pa asesina presidente Maduro y e dirigentenan halto di gobierno, a wordo frustra p’e miembronan di Fuerza Armada Nacional Bolivariana (FANB) y di e Unidad di Operacionnan Tactico Special (UOTE) di Polis Nacional Bolivariano (PNB).
Na augustus di e aña aki, Berry y Denman, kendenan a admiti di a comete delito di conspiracion, asociacion, trafico ilegal di arma di guera y terorismo, a wordo condena na 20 aña di prizon na Venezuela.
LIBERACION DI SAAB
Saab, di su parti, a wordo deteni na 2020 durante un escala na Cape Verde ora cu e tabata bayendo Iran, den un mision diplomatico pa negosha acuerdo petrolero y adkiri remedi y alimento pa Venezuela memey di e sancion y e blokeo di Merca y Union Europeo contra Caracas.
E avion di e funcionario a haci un parada tecnico rib’e isla African pa recarga combustibel, pero e autoridadnan local a detene riba peticion di Washington, a pesar di su condicion diplomatico. Despues el a wordo extradita pa Merca na october di 2021.
Despues di su detencion, defensa di e diplomatico a cualifica e echo como un arbitrariedad y a denuncia cu e tabata victima di abuso, tortura y violacion di su derechonan humano..
Fuera di esey, a insisti cu Saab no por enfrenta cargo na Merca pasobra e tabata gosa di inmunidad diplomatico desde prome cu su aresto.
Venezuela a cualifica e extradicion di Saab pa Merca como un “secuestro” cu ta afecta e derecho internacional y diplomatico y a insisti cu su detencion na Cape Verde a wordo haci di manera “ilegal”, sin sikiera un orden di captura, “violando e leynan di e pais y e Convencion di Viena.”