Diahuebs mainta a presenta un plataforma di recompensa nobo na Aruba pa cliente. Janelle Arends, representante di Island Fleet Sales & Services (IFSS) y a conta cu na september 2020, IFSS a introduci su prome plataforma di carchi prepago na Aruba, cu actualmente tin mas di 5 mil usuario.
Awe t’e inicio di un experiencia nobo p’e mercado di Aruba cu e programa di Spaar Mas. Ta contento di por lansa e di dos plataforma aki, mirando e oportunidad cu a presenta su mes den e mercado di Aruba, pa Aruba y p’e clientenan di Aruba.
E plataforma aki a wordo diseña cu e pensamento con pa brinda e clientenan mas. Citgo Boulevard, hunto cu Citgo Santa Cruz, Cito Essoville y Ponton Service Station, a lansa oficialmente e plataforma di recompensa p’e clientenan. Pronto IFSS lo ta introduciendo mas compania cu lo ta asocia cu nan programa di spaar mas.
Humberto Acosta, Operations Manager di Citgo, a splica cu awe a cuminsa un era nobo. Pa nan ta un placer di por a anuncia e plataforma aki. Esaki ta un di nan cu ta existente caba, cual t’e Spaar Card UB Pay. Esaki ta algo cu e grupo a pensa riba su clientenan, cual ta central y a base di esey a dicidi cu nan mes lo bay haci algo pa nan clientenan.
Tin shete punto cual Acosta a splica durante e conferencia di prensa, kico t’e diferencia di loke nan tabatin y loke nan tin aworaki.
A dicidi pa nan haci algo pa nan clientenan unda cu ta consisti di 7 punto cu ta refleha e diferencianan di locual nan tabata tin den pasado compara cu loke nan tin awor. Na prome luga, e tarheta cu lo introduci ta uno unda cu tur punto y tur cen ta conta.
Si prome cu 50 florin bo tabata haya 4.9 punto, cu esaki bo ta haya tur e puntonan total – dus bo lo spaar mas pasobra bo lo haya mas. Tambe tabata e parti di Redeem unda por ehempel tabata tin den esun anterior un solo compania so tabata tin 2.5, y tur otro partner solamente 2. Cu e carchi nobo no lo tin ningun discriminacion segun Acosta, tur partner cu den futuro lo uni cu nan tambe lo haya 2.5 punto cual ta un aumento di 25%.
Por ehempel si cu 500 punto antes bo tabata haya 10 florin, cu esaki bo lo haya 12,50, cual ta un aumento di 25%. E clientenan mes tabata pidi p’esaki y awor nan tin’e.
E carchi manera menciona, ta gratis y semper lo ta gratis, pa cliente existente y esunnan nobo.
Pa loke ta e lunanan di februari y maart, nan lo tin dobel Spaar Mas. Bo lo ta hayando esakinan dobel pa henter e campaña durante henter e luna di februari y maart y orario cu e stacionnan ta opera. Kiermen for di 6’or di mainta te cu 12’or di anochi por ehempel, e cliente ta bin y ta haya dobel punto. E no ta conta solamente pa gasolin pasobra e tienda tambe ta conta si bo cumpra lotto, kipashi, tur cos den tienda tambe ta duna bo oportunidad pa acumula punto.
Despues di e campaña aki, tur diadomingo mescos cu añanan anterior, tur cliente ta haya Dobel Spaar Mas. “Esaki ta algo positivo pasobra bo no tin cu lanta trempan pasobra antes tabata te cu 2’or, awor no mas. Henter dia nos ta bay haci e pa nos clientenan despues di dos luna di e campaña.”
Ta bay tin otro premio tambe cu ta hopi aprecia p’e clientenan, nan lo saca un ganado pa cada stacion tur luna. Lo tin diferente premio manera gift certificate pa gasolin y hopi mas.
Por ultimo lo tin un premio di sorpresa cu nan lo anuncia riba nan pagina di Facebook pronto cual ta Spaar Mas Reward Card cu tur hende lo tin oportunidad pa participa. Aki por like and share. Tur hende por participa.
Cu esakinan ta ofrece e clientenan pa keda cu e stacionnan aki y nan ta keda central. Pa e stacionnan aki esey ta lo mas principal.
