Opinion Publico: Diaranson mainta por a tuma nota di un grupo di taxista cu a organisa pa manifesta contra Gobierno, specificamente contra maneho di Minister Chris Romero. For di algun dia caba por a tuma nota cu e sra. Linda Orman, cu ta bisa di ta vocero di e mayoria di taxistanan na Aruba, a duna di conoce cu e ta organisando un manifestacion contra e maneho di Minister Chris Romero. Sra. Orman a bisa cu e lo pone 300 taxista riba caya dia di e manifetacion pa demostra dilanti bestuurskantoor.
Dia di berdad a yega y por a tuma nota cu e taxistanan a cuminsa prepara na tereno di ex Bushiri Hotel pa sali bay den caravana pa bestuurskantoor. Pero pa sorpresa di hopi cu tabata den espera di dicho manifestacion, e cantidad di taxista cu a yega bestuurskantoor no tabata ni mitar di loke cu sra. Orman a papia di dje y mucho menos di e total di taxi cu tin na Aruba.
E ora nos ta puntra nos mes; ki cu autoridad sra. Linda Orman ta exigi Gobierno accion den nomber di e taxistanan si a keda demostra caba cu e no a logra uni e taxistanan y no tin e mayoria? Con Gobierno ta bay midi e deseonan real di e 80% di e taxistanan cu claramente no ta apoya sra. Orman? Cada taxista tin un vergunning individual, dus ta un empresa riba su mes, con sra. Orman por ta sigur cu loke e ta pidiendo ta loke tur 450 taxista kier?
Sin duda e mundo di taxi na Aruba ta complica y ta bisto cu mester bin un union den nan pa asina por escohe un representante democraticamente. Pasobra un Gobierno no por yega sinta na mesa cu un representante di un grupo di taxista cu ta bisa di ta representa e mayoria (cu lo mester ta por lo menos 226 taxista), sin cu e por prueba si valides como tal. E ta algo sumamente delicado pasobra lo por tuma decisionnan den pro di un grupito y cu lo por tin efecto negativo riba e mayoria.
