Daphne Lejuez, parlamentario independiente, cu a bandona MEP, a dicidi di sigui den politica y ta bay den direccion di un vision liberal progresista, manera el a bisa awe den un conferencia di prensa.
Lejuez a bisa cu el a papia cu su famia den e fin di Siman Santo y a dicidi di keda den arena politico y a sigui cu Accion21 cu ta boga pa un sistema moderno unda cu comercio ta bay wordo modernisa, kibrando cu e redtape cu ta un obstaculo pa haci negoshi na Aruba.
Lejuez a anuncia esaki den presencia di lider di e partido Miguel Mansur.
Manera por corda, Daphne Lejuez a bandona partido MEP den discusionnan riba e tema di Medio Ambiente. El a declara su mes independiente, aunke e tempo ey a bisa cu e ta kere den cierto parti di maneho di e partido.
Den e temporada preparando pa eleccion, el a admiti, diferente partido a acerca su persona pero el a scoge pa Accion21 basa riba e programa cu Accion21 a mustr’e. Pero tambe a hunga un rol ta e hecho cu politica tradicional no ta funciona mas na Aruba.
Elección parlamentario, adelanta, ta tuma luga dia 25 di juni awo. Ademas di e partidonan cu a participa den eleccion pasa, tin diferente partido politico nobo cu ta interesa pa participa manera Accion21, HTC, y Partido Pueblo Prome, cualnan tur mester busca suficiente firma pa haya e derecho di por participa.