Recientemente a tuma lugar un incidente masha serio riba lama cu tabata rekeri rescate y atencion medico cu urgencia.
Central di Polis a dirigi e patruyanan policial y e prome patruya tabata di Strand Politie cu a yega na e sitio. E agentenan policial a nota cu e situacion ta serio y di emergencia. Aki ta unda cu e agente policial R. WESTER a bay den accion pa rescate no un pero dos turista di nacionalidad Hulandes cu problema y luchando pa nan bida den lama.
“Ora mi a yega mi a wak e situacion, mi ta un piscado (den tempo liber) y mi conoce e lama na Arashi. Mi conoce e stroom y mi a dicidi di riesga mi mesun bida pa yudanan sin pensa dos bez” tabata palabranan di Wester.
E ta sigui conta cu di biaha el a kita parti di su uniform, keda den boots cu Carson largo pasobra unda e turistanan ta tabata riba un coral cu por corta tur su curpa. Di biaha e la landa bay sercanan, calma tur hende coordina e scenario na unda tur hende tabata den pánico y asina traha un plan pa e prome turista yega tera.
Na momento cu e prome turista a yega tera e di dos agente policial a cuminsa cu reanimacion wardando riba ambulance mientras cu mas hende a yuda pa trece e di dos turista canto via un rubberboat. Despues un Kite Surfer a localisa e di dos turista den lama.
“Esaki mi a scohe p’e, pa yuda tur hende te na unda cu ami por”. Tabata palabranan di Polis Wester.
Altocomisario di Polis Arnhem na e ocasion aki ta manda un palabra di condolencia na e famia di e dos turistanan.
“Esaki ta e esencia di nos trabou, mi ta hopi orguyoso na mi colega Wester pa su balentia, empeño y a riesgo su bida pa salba otro.” Tabata palabranan di altocomisario Arnhem. Arnhem a reconoce Wester cu un “Oorkonde” como tambe un regalo chikito pa su servicio brinda. Di e forma aki ta sigui elogia nos agentenan policial cu ta bay e extra mile den nan trabou di Polis.
