Un persona desconoci a ataca un obispo y varios fiel durante misa den e iglesia di The Good Shepherd Church di e localidad di Wakeley, west di e ciudad di Sydney, prensa local a informa. Como resultado di e agresion, por lo menos cuater persona a resulta herida, incluyendo obispo Emmanuel.
E atake a keda graba, ya cu e misa tabata wordo transmiti en bibo riba e pagina di YouTube di e Iglesia. Riba e imagennan por a mira con un homber, bisti na preto, tabata acerca e altar y a cuminsa hinca obispo Emmanuel varios biaha cu un cuchiu. Despues, e transmision en cuestion a wordo elimina di e plataformanan oficial di e iglesia pa motibo etico.
Den cuestion di seconde, e fielnan y e otro miembronan di clero, a rondona e atacado y a deten’e pa entregu’e na polis, cu a acudi n’e luga hunto cu varios ambulance cu a atende e heridonan. Ta detaya cu ningun persona afecta a sufri herida cu a pone nan bida na peliger.
Autoridad Australiano ta investigando e motibonan di e atake. Di acuerdo cu polis local, e detenido “ta colaborando” cu e investigadonan.
E ultimo atake aki a tuma luga poco despues cu diasabra ultimo a sosode un hincamento masivo den un centro comercial na Sydney cu a resulta den morto di por lo menos seis persona, incluyendo un baby.