Durante di un patruya di e avion Dash di Wardacosta e tripulacion a detecta un boto ta drif ariba lama. Na momento cu a bay investiga a lanta sospecho cu tin un persona sin bida den e boto cu tawata drif.
A base di e informacion cu e tripulacion di e avion Dash a manda pa e Centro di Rescate y Coordinacion di Wardacosta a dirigi e cutter Panter di e punto di sosten na Aruba pa bay na e localidad di e boto.
Locual a haci e buskeda di e boto un reto ta e hecho cu e condicion di lama y tempo tawata basta malo.
E lama tawata bruto cu hopi biento y olanan halto. E Centro di Rescate y Coordinacion a bolbe dirigi e avion di patruya a pa asisti e cutter Panter den e buskeda di e boto.
Na yegada na e boto e tripulacion di Panter no a logra baha riba e boto pa motibo cu tempo tawata hopi malo. Tambe e tripulacion a detecta diferente curpa sin bida cualnan tawata den estado avansa di descomposicion.
E cutter Panter a haci diferente intento pa por logra touw e boto, pero esaki no a logra debi cu e cabuya tawata kibra na caminda.
E lama bruto y e tempo malo a pone cu un dado momento e cabuya di touw a bolbe kibra y Panter a perde e boto den e scur di anochi, despues di esaki no a logra detecta e boto mas. Wardacosta a saca un notificacion pa barconan riba lama tambe tin un ‘sharp lookout’ pa e boto cual ta drif riba lama. Wardacosta conhunto cu autoridadnan di Aruba y partnernan internacional a cuminsa un investigacion den e caso aki.
No ta probabel cu e boto aki ta bini di Venezuela mirando cu a hay’e den awanan internacional. E estado di descomposicion di e curpanan ta mustra cu nan tabatin basta dia riba lama grandi sin cu ningun barco a topa cu nan. Tin sospecho cu nan a bini di e area di continente Africano.