John Barnett, un ex-ingeniero di e multinacional Boeing, a wordo haya sin bida diasabra den su auto para den e parkeerplaats di un hotel di Charleston (South Carolina, Merca), e medionan local a informa.
Aparentemente a trata aki di un suicidio, ya cu e homber, di 62 aña, tabatin un herida di bala cu parce wordo haci p’e mes, di acuerdo cu e oficina di forense di e condado di Charleston. Barnett tabata den dicho districto pa wordo interoga pa un demanda di represalia contra e empresa di aviacion.
Barnett a denuncia na 2019, cu e empleadonan di e planta di South Carolina, carga cu trabao, tabata monta cu frecuencia piesa di calidad inferior den e avionnan y tabata informa di e sistema di oxigeno defectuoso cu por a provoca cu un di cada cuater masker di oxigeno no ta funciona corectamente.
Aunke Boeing a nenga e afirmacionnan di Barnett, un investigacion di siguimento di e Administracion Federal di Aviacion di Merca, a duna credibilidad na algun aspecto di su acusacionnan. Segun un informe, mas di 50 piesa “no conforme” no por a wordo rastrea y a perde den e sistema di e compania.