E asesinato di dos menor di solamente shete y tres aña di edad a causa shock y rechaso. Aparentemente e muchanan lo a wordo tortura y despues asesina pa nan propio tata, echo cu ta den investigacion.
E echo a sosode den e zona rural entre e municipio di Distraccion y San Juan del Cesar, zuid di La Guajira, caminda cu a haya e menornan, cu tabata man mara.
Coronel Alvaro Mora, comandante di Infancia y Adolescencia di Polis, a splica cu e supuesto agresor a choca e muchanan, causando nan morto. Despues el a purba di kita su bida, pero a alcansa pa wordo hiba na un centro medico, pa cual e lo wordo husga pa ta e principal sospechoso.
“E homber aki kier a atenta contra su bida door di a tira su mes dilanti un vehiculo di transporte publico riba caminda publico, caminda cu el a wordo herida y hiba n’e hospital di e localidad. E ta den custodia di Polis Nacional y den desaroyo di e actonan urgente pa genera orden di captura cu lo permiti husgamento y p’e responde na autoridad componente p’e lamentabel echo aki,” polis a señala.
Di su parti, coronel Diego Montaña, comandante di Polis di La Guajira, a señala cu “segun e investigacionnan preliminar, tata di e menornan t’e supuesto responsible di e acto reprochabel aki, Polis ya a desplega un componente p’e ubicacion di e muchanan reporta desapareci desde diasabra ultimo, dia 30 di december.”
ASINA EL A SOSODE
E caso lamentabel aki a cuminsa ora cu e homber a yega dia 30 di december n’e cas di e welonan band’i mama di e muchanan. Esey tabata custumber, miho bisa, cu nan ta pasa algun ora cu ne of di un dia pa otro, despues di e separacion cu mama di e menornan.
A supone cu e muchanan lo mester a wordo debolbi bek na su welonan riba e mesun dia, pero esey no a sosode. Dia 31 di december, den ora di atardi, autoridad policial a raporta cu un individuo lo kier a tira su mes dilanti di un bus riba e caminda entre Distraccion y Fonseca, caminda cu e vehiculo aki a alcanc’e. E persona aki a ricibi asistencia medico y hiba n’e Hospital Local di San Juan del Cesar.
Tabata asina, cu na momento di a investiga cu tabata trata di e individuo aki, a traves di su famianan, a descubri cu e tabata e tata di e dos muchanan, cual tabata busca pa su welonan y nan mama.
N’e momento ey ya e caso di e desaparicion di e rumannan a wordo poni na conocemento di Comisaria di Famia di e municipio di Fonseca.
Comandante di Polis na La Guajira, coronel Alexander Vargas, a detaya cu un ciudadano a informa cu e dos muchanan tabata morto, den un sector di mata y aleha. E agentenan na momento cu bay verifica, a establece cu tabata trata aki di e yiunan di e individuo cu a purba di mata su curpa.
Por lo tanto, autoridad a lig’e n’e asesinato door di horcamento di e victimanan. “Aparentemente, esaki ta un tema pasional pasobra e mama di e dos muchanan ya no tabata kier a sigui cu e relacion. E muchanan tabata bao cuido di nan welonan parti mama y e persona aki bay busca nan manera custumber y lo mester a entrega nan por lo maximo e dia siguiente,” e oficial a splica.
Coronel Alexander Vargas, a indica tambe cu na momento di a haya e curpanan, a cuminsa cu un investigacion riguroso di parti di Fiscalia General di e Nacion pa establece e ora di morto di e menornan di edad, cual cadavernan a keda na Medicina Legal.
“Nos ta wardando p’e wela di e muchanan ta mas calma pa por haya sa mas di e situacion, como tambe por interoga e individuo aki cu ta e principal sospechoso, pero te asina leu a keda keto. Lo bay oper’e door di un herida na su heup, pero e ta den calidad di custodia te ora haya orden di captura. Polis Nacional ya a desplega tur e capacidadnan institucional pa por clarifica e detayenan di e asesinato aki y brinda sosten necesario n’e famia afecta,” coronel Alexander Vargas a indica.