Diabierna, 5 di april 2024, den ora di mainta Wardacosta a haya notificacion cu tabatin un boto tipo yola cu lo a subi barancanan na Oostpunt den area di Hambrak.
Mesora Wardacosta a meld e informacion akí na Cuerpo Polisial di Corsou y hunto autoridad a manda patruya na tera di Wardacosta, e miembronan di warda di polis di Montaña y e unidatnan di U.S.T. y e helicopter di Wardacosta den direccion di e sitio.
‘Durante e buskeda, cu a dura henter dia, riba tera a detene den ora di mainta seis (6) indocumentado. Den e ٔarea a haya un tas, den kua tabatin arma di kandela. Den ora di atardi y anochi Wardacosta y Polis a laga e helicopter y e patruyanan den e area y a bin topa cu shete (7) indocumentado mas. Na tur a detené 13 persona indocumenta, di kual 7 hende homber y 6 hende muhe. Un di e hendenan muhenan tabata un menor di edad. Ta trata di diesdos (12) persona di nacionalidad Venezolano y un (1) Colombiano.
Den e grupo di indocumentado aki, tin persona cu ya caba den pasado a keda deporta for di Corsou y tambe un dama, cu a keda sentencia pa traficacion di hende. Tur e personanan aki a wordo entrega na Departamento di Migracion, cu lo continua cu e investigacion den e caso akí.