A “hack” pagina di Facebook di Prome Minister

Bo por elima Facebook account di e prome mandatario di e pais aki sinembargo bo no por elima e berdad cu ta sali for di dje

Awendia, un di e medionan di comunicacion mas lihe ta Facebook haciendo esaki esun di mas popular tambe den nos tempo. Cu un cantidad grandi di hende na Aruba cu ta uza facebook, Prome Minister Evelyn Wever-Croes ta conta cu gran parti di e audiencia aki. Entre su audiencia, ta inclui famia, amistadnan personal como amistadnan di Facebook mes.

Prome Minister no solamente ta uza su Facebook personal pa mantene contacto cu famia y amistadnan, pero tambe e ta mantene e pueblo informa cu loke ta pasando den actualidad na Aruba siendo e Prome Minister di nos pais.

Prome Minister ta lamenta cu hende cu mal intencion a haci mal uzo di nan conocemento pa ‘hack’ su Facebook account y a pone esaki for di alcanse pa Prome Minister pero tambe pa pueblo. Den esaki, ta tratando for di ayera caba cu Prome Minister a nota e iregularidad aki pa tuma contacto cu Facebook pa asina logra recobra su pagina di Facebook mas lihe posibel. Investigacion di parti di Facebook a wordo pidi tambe pa haya sa e posibilidad tanto pa recobra e pagina como tambe pa sa ken ta esnan cu ta tras di e mal hecho aki.

Prome Minister ta pidi disculpa na su amistadnan di Facebook y door di e medio aki ta aclarea cu si un persona no ta wak Prome Minister su postnan mas, ta pa e motibo cu su Facebook actualmente a wordo desactiva pa esnan cu no tin otro cos di haci sino perhudica e contacto entre Prome Minister y pueblo.

Pero un hecho ta keda, bo por elima un Facebook account di e prome mandatario di e pais aki sinembargo bo no por elima e berdad cu ta sali for di dje. Prome Minister ta sigui informa pueblo via radio, television, corant, Facebook di Gabinete Wever-Croes, Whatsapp, App di Gobierno y nos corant IslaOnline.

Comments

comments