Awe mainta a tuma luga un conferencia na Corsou di e departamento di trafico aereo, caminda cu nan a keda anuncia cu tin acuerdo di pago cu Aruba Airlines, pero no a cumpli cu e acuerdo. Sin embargo, despues di varios lobbymento, a ricibi e pago, a habri espacio aereo pa nan por a baha na Aruba.
Awor aki tur cos ta ok cu e aerolinea. Nan por sigui duna servicio normal, segun e funcionario di Trafico Aereo di Corsou.
Segun e funcionario, loke a sosode ta cu a saca un AIC, cu ta un Aeronautical Information Circular for di siman pasa diaranson, caminda cu a bisa cu pa dialuna lo stop cu e servicio. Si no haya e pago dentro di e periodo ey, lo a stop servicio dialuna, loke a sosode.
E aerolinea, plus tur e centronan di control di trafico aereo tabata sa for di siman pasa diaranson, ora cu a saca e AIC. Nan tabata na altura. Miami, for di unda nan a sali, tambe nan tabata na altura y no sa dicon a laga e avion sali toch.
No tabata tin contacto cu Merca despues. A delanta si prome cu esey, si tabata tin contacto, caminda cu nan a puntra si e AIC ta na figor ainda, cual a confirma cu si.
Hecho ta cu a saca e AIC y esaki tur hende ta na altura, cual esey ta normal den aviacion ora cu sak’e, cu e hendenan ta na altura kico ta pasando. No por bisa kico a bay otro na Miami y dicon e avion a sali toch. Ora cu e no paga, e ta haya un recordatorio di IATA cu e no a paga. Esey ta sosode sigur dos pa tres biaha. Despues Departamento di Trafico Aereo ta tuma over. Na e momento ey ta manda un carta y bisa cu tin tanto na debe y no a haya e cen. Si nada no sosode, ta saca un di dos carta y despues di e di dos carta ta bay den man di abogado.
Departamento di Trafico Aereo tin un areglo di pago cu nan caba, ta cumpli nan no a cumpli cun’e na e momento ey. Na momento cu a ricibi e pago, a laga nan pasa e ora ey, pa nan por sigui bay.