Aruba Airport Authority N.V. (AAA), representa door di su CEO Joost Meijs y Director Safety Security and Regulatory Compliance Angeline Flemming, recientemente a firma un acuerdo di coperashon cu Universidad di Aruba (UA) representa door di Eric Mijts.
E acuerdo su meta ta pa desaroya actividadnan hunto y crea espacio pa colaboracion den areanan di educashon, investigashon, servicio comunitario y pa intercambia oportunidad.
AAA su CEO Joost Meijs a indica cu sostenibilidad den tur faceta lo ta AAA su principio pa guia con Aeropuerto Internacional Reina Beatrix (AUA Airport) ta haci negoshi den e añanan na caminda. Mirando cu Aruba ta parti di e comunidad mundial, AAA a scohe pa accepta e Metanan di Desaroyo Sostenibel cu Nacionnan Uni a implementa. “E crisis di Covid a mustra nos cu entidadnan cu no ta pone enfoke riba sostenibilidad a largo plaso den tur aspecto di nan negoshi, no lo sobrebibi e crisis”, segun CEO di AAA.
E acuerdo aki ta di suma importancia pa e “Sustainable Island Solutions” por medio di e programa di Sciencia, Tecnologia, Ingenieria y Matematica (SISSTEM) na UA. Eric Mijts di UA a splica cu colaboracion entre UA y sector priva ta esencial pa crea flexibilidad pa desaroyo sostenibel y pa crea oportunidad pa studiantenan riba nivel internacional den e contexto Arubiano. “Den e sentido einan nos ta mira AAA como un fit ideal pa colabora riba diferente proyecto di sostenibilidad y inovashon,” asina Mijts a expresa durante e ceremonia di firmamento.
UA y AAA inicialmente lo colabora riba e topiconan di “Autonomous Aviation”, “Building Sustainability” y “Sustainable Landscaping.”