Banco Central a publica ultimo e rapport cu ta disponibel riba nan website, ‘State of the Economy’ pa e prome 6 lunanan di aña 2018 te na unda cifranan ta disponibel pa e temporada aki.
E rapport di Banco Central ta indica cu economia a mustra señalnan di un poco mehoracion uzando e termino ‘slightly’. E rapport ta indica cu e mehoracion mas tanto ta bin door di turismo cual ta logico, siendo turismo e pilar economico principal. Tambe e rapport ta indica cu influencia positivo a bin tambe di parti di e consumidor cu a paga mas impuesto, na unda cu e compliance di impuesto tambe a haci cu e resultado ta miho. Esaki, segun Parlamentario Setty Christiaans-Yarzagaray, ta riparabal na e esfuersonan di Departamento di Impuesto ta bin ta haci riba cumplimento di pagonan den diferente forma cual tin su beneficionan tambe.
Gobierno y su finansas ta depende di esaki y e economia tambe ta depende di esaki.
E rapport di Banco Central ta indica tambe cu tanto e confiansa di e consumidor como e confiansa di e mundo comercial, toch ainda no ta ful positivo. Esaki, segun e rapport di Banco Central a wordo influencia door di entre otro e anuncio di e Crisisheffing. Esaki a haci cu hende a bira mas cauteloso cu na su turno por causa of influencia e desaroyo di economia.
Parlamentario Christiaans-Yarzagaray ta duna di conoce cu apesar cu Banco Central a reconoce cu tin un desaroyo positivo, aunke chikito, toch tawata tin partinan negativo. Pa motibo di esaki segun e Parlamentario, a yega e momento cu economicamente mester bin desicionnan of anuncionan concreto. E Parlamentario ta indica di ta kere cu esaki ya ta bin ta sosode un poco caba pero ainda falta su señalnan na unda cu e confiansa di e consumidor y e confiansa di e mundo comercial mester wordo reestableci pa asina economia haya su chens di draai miho.
E influencia den e parti turismo pa e prome 6 lunanan di 2018, apesar cu e mercado Venezolano ta cayendo, toch turismo a logra resultadonan positivo. E percepcion di e Parlamentario den esaki ta cu ainda Aruba ta keda hopu dependiente di e mercado Mericano cual e rapport di Banco Central ta indica tambe. Practicamente 70% di nos mercado ta bin for di Noord America, pues entre Merca y Canada. Esaki, segun Parlamentario Christiaans-Yarzagaray, ta haci nos turisticamente pero tambe economicamente vulnerabel mirando cu nos ta dependiente di e mesun destinacionnan.
Un otro influencia positivo den e mundo turistico na Aruba ta e otro destinacionnan den Caribe cu ainda ta recuperando nan forsanan di e efectonan hopi pisa di e horcan cu a sosede na final di 2017. Lamentablemente por bisa, cu esakinan ta ventahanan cu tin ora otro paisnan tin situacionnan dificil, Aruba como destinacionnan por probecha di e situacion. Y esaki ta locual a sosode tambe na Aruba.
Den e mundo hotelero tambe tin cifranan hopi positivo cu a wordo anuncia den e rapport di Banco Central. Parlamentario Christiaans-Yarzagaray ta opina cu den e parti hotelero lo ta bon tambe pa traha bek riba un sistema di data mas completo, mirando e hecho cu AHATA ta basa nan informacion riba un grupo mas chikito cu informacionnan di antes pues ainda falta un bista general con e industria hotelero mes ta moviendo.
Di parti di Gobierno, nan ta indica cu e entrada a subi debi mas tanto na e compliance di Impuesto cu a drecha y tambe e gastonan cu a baha un poco cu ta haci tambe cu e debe di Aruba tin un recuperacion minimal di -0.1% di debe na GDP. Esaki ta un desaroyo positvo pasobra e no ta un crecemento despues di hopi tempo.
Parlamentario Setty Christiaans-Yarzagaray ta enfatisa tambe cu pa loke ta trata debe di Aruba, señal cu di mehoracion aunke asina minimo, ta e prome stapnan en principio cu ta mustra pakico no solamente na Aruba por recobra e confiansa bek pero tambe cu Hulanda lo por recobra e confiansa bek cu e gobierno aki cu ta actuando serio y cu tur intencion pa drecha e situacion financiero economico di pais Aruba.
“Naturalmente nos sa cu Gobierno actual no tin un aña y mei ainda den gobernacion. Pero nos lo wak e efecto di e señalnan aki ora cu cera 2018. E ora nos lo wak miho e resultadonan tambe”, Parlamentario Setty Christiaans-Yarzagaray a duna di conoce.