Den e cuadro di renobacion y mantencion di nos facilidadnan deportivo riba nos isla, St. Fundacion Lotto pa Deporte y un di su partnernan strategico Aruba Sport Unie a sigui e plan pa mehora mas ainda e accomodacion di Centro Deportivo Libertador Betico Croes. Despues cu den luna di augustus ultimo a duna un cara nobo na un accomodacion historico na Aruba den Centro Deportivo Libertador Betico Croes, awor a dicidi di drecha e sistema di aire acondiciona.Ya pa algun aña, e airco den e accomodacion di Centro Deportivo Libertador Betico Croes na Sta Cruz no tabata funciona den forma optimal y e fluho di biento no tabata esun di mas mihor, consecuentemente e lugar tabata hasi basta calor sigur pa esnan cu tabata usa esaki den oranan di atardi. Cu otro palabra nos ta papia den un inversion cu tawata necesario.
Dialuna ultimo a pone e airconan den funcion y mesoraesnan presentepor a nota e diferencia. Awor e accomodacion ta frieu suficiente pa asina nos atletanan por praktica y competi den nan deporte cu mas gusto. Mester bisa cu e sistema no ta completamente cla, falta algun detaye chikito y un fase ainda pa drecha.
Presidente di Aruba Sport Unie, Sr. Gerald Franca ta sumamente contento cu e ayudo di Lotto den e proceso di mantencion y renobacion di Centro Deportivo Libertador Betico Croes.
“Algun tempo atras, Aruba Sport Unie a sinta na mesa cu St. Fundacion Lotto pa Deporte pa asina yega na un acuerdo pa yuda na verf e edificio di Centro Deportivo Libertador Betico Croes mirando cu esaki pa hopi anja no a haya un capa di verf. Na mesun momento a keda di cumpra dos unit grandi di aircondition, ya cu e dosnan chikito no tabata duna aire suficiente mirando e magnitud di e accomodacion. Awo cu e dos unitnan grandi e resultado ta completamente diferente y satisfactorio, e lugar ta mucho mas agradabel, esey bo ta tende tambe na e comentarionan di esnan cu ta bishita e lugar. Ta premira cu aki tres siman lo keda cla completamente cu e sistema di aire acondiciona, algun pieza di exterior lo yega dentro di poco y e ora ey e accomodacion lo ta den full operacion”, Sr. Franca a bisa.
Aruba Sport Unie ta masha agradeci na St. Fundacion Lotto pa Deporte cu a yuda cu e subsidio pa tanto e verfmento di e accomodacion paden y pafor como tambe cu e compra di e dos unitnan grandi. E apoyo y sosten di parti di St. Fundacion Lotto pa Deporte sigur ta uno inmenso ya cu awor e edificio di Centro Deportivo Libertador Betico Croes ta optimal atrobe manera cu e tabata antes. Mester bisa aserca cu kizas lo bay tin consecuencia den e huur di e lugar ya cu e coriente lo subi door di e airconan nobo, pero esey ta un punto cu lo disucti riba dje den e proximo dianan.