Un ekipo di cientifico di e Universidad di Ciencia Medico di Arkansas(Merca), dirigi p’e investigado Sue Griffin, a descubri un remedi potencial nobo, denomina CBA2, pa preveni e malesa di Alzheimer den persona cu e asina yama ‘gen di e malesa’, APOE ε4.
E ‘gen di e malesa’
E expertonan ta calcula cu entre 50 y 65% di e personanan cu Alzheimer a hereda e gen di riesgo APOE ε4, cu ta codifica pa apolipoproteina E4 (ApoE4), di uno of ambos mayor. Tambe nan ta señala cu, e personanan cu tin un copia di e gen tin tres biaha mas posibilidad di desaroya e malesa, mientras cu esunnan cu dos copia (un di cada progenitor) tin entre 12 y 15 biaha mas chens di sufri Alzheimer.
Na 2018, e ekipo dirigi pa Griffin tabata e prome den mustra con APOE ε4 a impedi cu e celnan celebral realisa e autofagia lisosomal cu loke ta elimina su productonan di sushi. E alteracion aki ta responsabel di e formacion di placa y conopi den e celebro cu ta caracteristica di e malesa di Alzheimer. “Nos serie di descubrimento relaciona cu APOEε4 y impactante di mi 50 aña como cientifico,” Griffin a comenta.
Exitoso cambio di enfoke
Mayoria di e investigacionnan riba e trastorno aki na Merca, a obtene resultado poco prometedor, ya cu nan a enfoca den e tratamento cu por elimina e placa y e conopinan di e celebro asocia cu e malesa. E problema di e terapianan aki ta encera cu e personanan cu sintoma leve di Alzheimer ya a perde aproximadamente e mita of mas di e neuronanan responsabel di e memoria y e rasonamento ora cu e intervencion cuminsa.
E ekipo di Griffin a cambia e enfoke aki na e prevencion trempan mediante e deteccion di e asina yama ‘gen di e malesa’ y su subsiguiente supresion. “Ningun otro ekipo di investigacion a haya un remedi potencial specificamente pa blokia e efectonan dañino di APOE ε4 hereda,” e experto a indica.
Descubrimento di e remedi candidato
Uzando bioinformatica y tecnica di e modelo computa, e ekipo a descubri e luga farmacologico den e proteina ApoE4. Meenakshisundaram Balasubramaniam, co-autor di e estudio, a analisa cerca di 800 mil candidato den solamente dos dia. Su hallazgonan simula door di computer riba e accion di e remedinan dirigi na ApoE4 a valida den varios sistema ‘in vitro’ y ‘in vivo.’ E ekipo lo efectua varios investigacion preclinico riba un mayor escala riba e remedi candidato, CBA2, fuera di purba otro posibel remedi.
“Nos speransa ta cu e personanan cu tin un of dos copia di APOE ε4 algun dia tuma e remedi regularmente durante henter nan bida y reduci significativamente su riesgo den desaroya e malesa di Alzheimer,” Griffin a subraya. E hallazgonan a wordo publica recientemente den Communications Biology.