Internacional: Ocho persona ta fayece despues cu un auto a dal un grupo di persona para na un bus stacion cerca di un refugio pa personanan sin hogar y migrantenan den localidad di Brownsville na Merca, cerca di e frontera di Mexico. E incidente aki a tuma luga alrededor di 8:30 di mainta. Oficialnan ta identifica e sospechoso como George Alvarez di 34 aña cu tabata na stuur di un Range Rover y ta un residente di Brownsville.
E homber a wordo acusa formalmente di ocho cargo di homicidio imboluntario y su multa pa ta liber ta na 3.6 miyon dollar. Na e momentonan aki e dicho sospechoso ta conoci cu un historia criminal cu ta consisti di ladronicia di auto, posicion di marihuana, maneha intoxica y asalto riba un sirbido publico. E director di e refugio “San Pedro Ozanam”, Victor Maldonado a indica cu mayoria di e victimanan tabata hombernan Venezolano.
Imagen di camera por mustra cu e auto lo a pasa door di luz di trafico ora e tabata cora y asina ta alcansa e personanan cu tabata para na bus stacion. E Gobierno di Venezuela a manda un comunicado pa autoridadnan di Merca splicando cu nan kier un investigacion profundo pa saca afo si tabata un accion di odio of xenofobia contra di e comunidad Venezolano.
